فریدون ایبراهیمی کیمدیر؟

   فریدون ابراهیمی 1326-1297 (29 یاشلی)

فریدون ابراهیمی 1297-جی شمسی ایلده آستارا شهرینده روشنفکر بیر عائله‌ده آنادان اولموشدور. او، ابتدائی تحصیلینی آستارادا آلمیشدیر. فریدونون آتاسی میرزاغنی 1308-جی ایلده سیاسی اتهاملا حبسه آلینمیش و بیر نئچه ایل زینداندا قالدیقدان سونرا نهاونده تبعید اولونموشدور. فریدون آتاسینین حیمایه‌سی آلتیندا آستارادا 9-جی کلاسی قورتاریقدان سونرا انزلییه گئدیر و 10-جی کلاسی‌دا فردوسی مکتبینده بیتیریر. عالی تحصیل آلماق مقصدیله فریدون تهرانا گئدیر. او، تهراندا حقوق فاکولته‌سینده تحصیل آلدیغی زامان خصوصی تدریس و روزنامه‌لره مقاله یازماق واسطه‌سیله اؤزونون گونده‌لیک یاشایشینی تأمین ائدیردی. 1324-جی ایلده فریدون ابراهیمی آذربایجانا گلیر. بو زامان آذربایجاندا میللت ارتجاعا قارشی قیزغین موباریزه آپاریردی. فریدون ابراهیمی‌ده آزادلیق اوغروندا آپاریلان بو موباریزه‌یه قوشولدو و اؤز آتشین قلمیله اونا گؤرکملی خدمتلر ائتدی. آذربایجان ایالتی کمیته‌سینین نظارتی آلتیندا نشر اولونان «خاور نو» («یئنی شرق») روزنامه‌سینده فریدون ابراهیمی‌نین همین دؤرده یازدیغی مقاله‌لر ایرتیجاعین افشا ائدیلمه‌سینده مهم رول اوینامیشدیر. آذربایجانین دموکرات فیرقه‌سی تشکیل اولدوقدان و توده حیزبی ایرانین آذربایجان ایالتی تشکیلاتی «فیرقه» ایله بیرلشدیکدن سونرا فریدون ابراهیمی‌ده اونون سیرالارینا قوشولدو. وقتیله فریدونون «آذربایجان» و «خاور نو» روزنامه‌لرینده یازدیغی مقاله‌لری اللرده گزیردی. اونون «آذربایجان دانیشیر» آدلی سلسله مقاله‌لری تاریخی کئچمیشیمیزی بیر داها خاطیرلاداراق، خالقی آزادلیق اوغروندا دؤیوشلرده روحلاندیریردی. مؤلیف اؤز اثرینده نه کیمی بیر مقصد قارشیسینا قویدوغونو قید ائدره‌ک یازیردی: «منیم مقصدیم بودور ... اؤز حقیقی مقامی و موقعیتینی الده ائتمک اوچون بو گون قیام ائد‌ه‌ن آذربایجان میللتینی آزاد دنیایا تانیتدیرماق ایسته‌ییرم. بشریتین مدنییت تاریخینده آذربایجانین نه‌کیمی بیر مقاما مالک اولدوغونو گؤسترمک ایسته‌ییرم ...». ف. ابراهیمی بو مقاله‌لرده اؤز میللتینین پارلاق تاریخینی خاطیرلاداراق سونسوز بیر ایفتخار حسییله قئید ائدیردی:«آذربایجان مقدس ابدی اودلار اؤلکه‌سیدیر. بو عزیز تورپاغین هر بیر قاریشیندا ایفتخارلی بابالاریمیزین اونودولماز یادگاری قالیر. اونون کئچمیشده‌کی عظمتلی قلعه‌لالارینین قالیقلاری و مقدس آتشلرین اثرلری بیزیم بؤیوک آتالاریمیزین پاک روحی و سارسیلماز ایمانینی گؤستریر ...». بو زامان مرتجع و ساتقین جیزما-قاراچیلار، آذربایجان خالقینین تاریخی کئچمیشینی تحریف ائدن بیر سیرا اویدورما و بهتانچی مقاله‌لر نشر ائدیردیلر. فریدونون یوخاریدا قئید اولونان مقاله‌لری همین مرتجعلره قارشی «دیش سیندیریجی و منطقی جاواب اولماقلا برابر خالقیمیزین میللی آزادلیق حرکاتینین حاقلی و عدالتلی اولدغوندا گؤستریردی» فریدون ابراهیمی حادثه‌لری علمی نقطه‌نظردن تجزیه و تحلیل ائدیردی. او آذربایجان دموکرات فیرقه‌سینین مرکزی کمیته‌سینین اورقانی اولان «آذربایجان» روزنامه‌سینین تحریریه هیئتیله یاخیندان امکداشلیق ائدیر، روزنامه‌نین صحیفه‌لرینده سیاسی جهتدن کسگین، مضمون جهتدن دولغون مقاله‌لرله آردیجیل صورتده چیخیش ائله‌ییردی. 1325-جی ایلده فریدون ابراهیمی پاریس‌ده تشکیل اولونموش صلح کنفرانسینا آذربایجان مطبوعاتینین نماینده‌سی کیمی گؤندریلدی. اورادان قاییتدیقدان سونرا ابراهیمی همین کنفرانس بارسینده «آذربایجان» روزنامه‌سینده بیر سیرا مقاله‌لر نشر ائتدی. همین سلسه مقاله‌لر «ایران ما» روزنامه‌سی طرفیندن ترجمه اولونوب تهراندادا اوخوجو کوتله‌لرینه چاتدیریلدی. فریدون ابراهیمی دموکراتیک مطبوعاتیمیزین گؤرکملی خادیمی کیمی اؤز قلمی، بیلیک و باجاریغی ایله خالق حرکاتین- 21 آذر نهضتینین غلبه‌سی اوغروندا چالیشمیشدیر. 21 آذر نهضتینین غلبه‌سیندن سونرا، آذربایجان دموکرات فیرقه‌سینین و میللی حکومتین درین اعتمادینی قازانمیش اولان فریدون ابراهیمی آذربایجانین باش مدعی‌العمومی(دادستان کل) تعیین ائدیلدی. او، بو وظیفه‌نی یئرینه یئتیررکن میللی نهضتین نایلیتلرینین، میللی حکومتین قانون و قایدالارینین، آذربایجان خالقینین رفاهینین کئشیگینده دایانمیشدی. آذربایجان دموکرات فیرقه‌سینین بیرینجی قورولتاییندان مرکزی کمیته عضولیگینه سئچیلمیش ف. ابراهیمینین نهضتده ایشتراکی، خالق ایشینه صداقتی، یوکسک دولت خدمتی، آذربایجان گنجلیگی اوچون اؤیره‌نیلمه‌سی لازیم اولان بؤیوک سرمشق‌دیر. نهایت، 1325-جی ایلین آذر آییندا شاهنشاه قوشونلاری خائنجه‌سینه آذربایجانا سوخولدوقدان سونرا ابراهیمی‌ده حبسه آلینیر. او، زینداندا اولدوغو زاماندا اؤز خالقینین منافعی و گله‌جکه‌یینی مردلیکله قورویور، دربار نوکرلرینین بوتون توطئه‌لرینه و تضییقلرینه باخمایاراق دوشمن قارشیسیندا دیزه‌چؤکمور. فریدون محاکمه ائدیلدیگی زامان آذربایجان خالقینین حقوقونو شهامتله مدافعه ائدیر، نهایت، بیر نئچه آی حبسده ساخلانیلدیقدان سونرا جلادلار فریدون ابراهیمینی جمعه گونو، 1326-جی ایل خرداد آیینین بیرینده تبریزین گولوستان باغینین پالید آغاجیندان دارا چکدیلر. خالقین قهرمان اوغلو فریدون ابراهیمی فیرقه عضولرینین، زحمتکشلرین، و آذربایجان آیدین‌لاری‌نین سون درجه محبت بسله‌دیکلری و صمیم قلبدن سئودیکلری بیر موباریز ایدی. اونون اعدام ائدیلدیگی گون تبریز اهالیسینین ماتم گونونه چئوریلمیشدی. شاعیر و یازیچیلارین بیر چوخونون فریدون ابراهیمییه بؤیوک اثرلر، شعرلر، پوئمالار و حئکایه‌لر حصرائتمه‌لری هئچده تصادفی دئیل‌دیر. میللی نهضتیمیزین، دموکراتیک ادبیاتیمیزین گؤرکملی خادیمی اولان فریدون ابراهیمی آزادلیقلا اسارت آراسیندا گئدن دؤیوشون گؤرکملی قهرمانلاریندان و یئنی نسلین موباریز اؤرنک‌لریندن بیری اولموشدور.