ساتقین و ساتیلان !! هانگیسی سوچلودور!؟

ساتقین و ساتیلان !! هانگیسی سوچلودور!؟

بؤلوم : اؤیکوجوک

بیرینجی بؤلوم

باشقا اوخولاوتاقلاری (1) کیمی بیزیمده اوخولاوتاغیمیزدادا نئچه دینج اوتوماز (2) اوشاق واریدی. اونلارین باشچیلارینا دؤرد نفر اولدوغونا گؤره دؤرتلوک دییردیلر. گونده بیر فیریلداق و اویون بزهردیلر و اؤزلریندن سووای آیریلارینیدا پیس گونه سالاردیلار. او گونده بو دؤردلوک قوروپو پیچیلداشیردیلار. بئله گؤرنوردو یئنی بیر پیلان حاضیرلاییردیلار. بوینو یوغونلاری آیاغا قالخیب اؤرگتمهنین اوتوراجاغینا ساری گئدیب اووجوندا اولان سانجاقلاری چیخاریوئردی (3) و دیققتله اوتوراجاغین یوغروق (4) دریسینین آستیندا (آلتیندا) یئرلهشدیردی و اوشاقلارا بوزارارکن جولو بارماغینی بورنونون اوستونه - سوس سیمگهسی (5) اولاراق- آپاریب گئری دؤندو یئرینه اوتوردو. اوشاقلار پیچیلداشدیلار آنجاق بیریسینین جینقیری چیخمادی. هامی باشینی آشاغی سالمیشدیر و نه اولاجاغی!؟ گؤزلهییردیلر. چوخ چکمهدن اؤرگتمن قاپینی آچیب ایچری گیردی. اوشاقلار سایقی اولاراق آیاغا قالخدیلار و اؤرگتمن اوتراجاغا ساری گئدیب اوتوردو. سانکی بیردن داغ سو اوستونده اوتورموش دییه " آخ" دئیب قالخدی. بو اولای چوخ سورعتلی اولدوغونا گؤره اوشاقلار یئرلریندهده اوتورمامیشدیلار و اؤرگتمن قیزاریب بوزاردی. خیژم (6) ایله قیشقیریدی: هانسی قودوق بو ایشی گؤروبدور!؟ کیمسهنین سسی چیخمادی. آداملار هئچ، قاپیدان دووارداندا قورخو یاغیردی. اؤرگتمن گئنهده قیشقیردی: "دیلیز یوخ! سوروشدوم کیم بو سانجاقلاری باتیریب منیم اوتوراجاغیما!؟ " ائله بیل اوخولاوتاغیمیزدا کیمسه یوخودو! بیر زینه سس چیخمیردی. اؤلو توزو هاوایا سپیلمیشدیر سانکی. اؤرگتمن اووجونو بوتون گوجویله یازیتاختاسینا چیرپدی و اوشاقلار بوتون دیکسیندیلر. " بو ایشی گؤرهنی منه تانیتماساز بوتون اؤرگنجیلری اؤز درسیمدن سالاجاغام. ایندیده من کیلاسی ترک ائدیب و مودورون یانینا گئدیرم. بوگوندن بری بو کیلاس تعطیلدیر؛ ایسترسیزسه بو کیلاس اولسون و سیزده ایلین سونوندا بو درسده تابلاناسینیز (7) بوگونون سونونا قدر واختیز وار منه بو آدامی تانیتدیراسینیز." اؤرگتمن بو سؤزلری سؤیله ییب و کیلاسدان چیخدی. آردینجا قاپینی چیرپدی. ایندی اوشاقلار یئرلرینده اوتوردولار. اؤرگنجیلرین چوخو اللرینی یاریمیومروق ائتمیشدیلر و چنهلرینی اونون اوستونه سؤیکهمیشدیلر. درین دوشونوردولر. بیلمیردیلر نه ائتسینلر. هر دن دؤنوب و بو ایشی تؤردنلره یان باخیردیلار گؤزلریندن یالواریش یاغیردی. آنجاق قورخولاریندان بیر سؤز دییه بیلمیردیلر. بو سسسیزلیگی بوینویوغون اوغلان بیر داها سیندیردی: " ائشیدم یوخسا گؤرم بیری بو کیلاسدان گئدیب و منیم یوخسا یولداشلاریمین آدینی وئریبسه او آدامین یوخسا آداملارین ننه باجیسینی .... ؛ اؤزونوده آغلار گونه قویارام. " بو سؤز کیلاسدا اولان خبرچیلری و دئدیکاوتو (8) یایانلارین حالینی پوزدو و باشقا اوشاقلارین اومود چیراغینیدا سؤندوردو. بو یئرلرده گئنه بئلهنچی آداملار (خبرچیلر) آرادا اولان سورونلارین (9) چؤزهسی (10) اولانلاردیلار آنجاق اوشاقلارین چوخو مودوردان چوخ بو بوینویوغوندان قورخوردولار. بیرآزدان سونرا اوشاقلارین بیریسی کی آتوشقانین (11) یانیندا اوتوراردی یاواش سسله سؤیلهدی: " آی اوشاقلار اؤرگتمن ایندی پیللهلردن آشاغی گلدی و موتورونا ساری یوللاندی. " بیردن هامی آتوشقالارا ساری هاپپیلدیلار. اؤرگتمنین گؤرمهیینه باش قول سیندیریردیلار. اؤرگتمن موتورونا مینیب گئتدی و اوشالارین چوخوسو حالدان گئدیب "وای ددم وای" دئدیلر. اینانمایانلاردا ایناندیلار کی ایش داها برک پیرتلاشدی. بئله بللهنیر " بو سن اؤل او سن اؤلدن دگیل!" بو دورومدا بیرآن مودور کیلاسا گیردی و یئرلرینده اوتورمویان اوشاقلار جین کیمی یئرلرینه سوزولوب ائله هامی بیرلیکده آیاغا قالخدیلار. مودور اوشاقلارا ایلهشین دئمهدن حیرصله سؤیلهدی: " اؤرگتمنیز منه نه اولدوغو سؤیلهدی. ایندی منه دئیین کیم یوخسا کیملر بو ایشی گؤردولر. دئمهسز یوخسا بو آداملار اؤزلرینی تانیتدیرماسالارسا اؤرگتمنیز بو کیلاسا سون قویوب و هامینیزی درسدن سالاجاق. منده اؤز گؤرهویمده (12) اولاراق 5 نومره اینضیباط نومرهنیزدن چیخاجام. اؤرگتمنیز گئتدی و سؤیلهدی بو آداملار یوخسا آدام تانینمایانا چان او بو کیلاسا گلمییهجک. ایندی بو آدام یوخسا اونو تانیانلار بو گونون سونونا قدر واخت وئریلیر اؤزلرینی تانیتدیرسینلار یوخسا کیمسه اونلارین آدینی بیزه وئرسین و باشقا اوشاقلار اونون اودونا یانماسینلار." مودور سؤزلرینی دئدی و کیلاسدان چیخدی. گئنه اوشاقلار اوتوردولار. بیر چیخیلماز یول آچیلماز دوروم یارانمیشدی. اوشاقلار اوچ یئره بؤلونموشدولر. بیر قوروپ بوینویوغونلار قوروپو؛ بیر قوروپ آرادان آوارالار و باشقا قوروپ چالیشیردیلار بیر تمبل اوشاغی سئچیب و اونو راضیلاشدیرسینلار کی بو ایشی (سوچو) اؤز بونونا آلیب و هامینی قوتارسین.

بیرینجی بؤلومون سونو

سؤزلوکجوک :

1- اوخول اوتاغی = کیلاس

2- دینج اوتوماز = شولوغ ناآرام شر

3- چیخاری وئردی = تئز چیخارتدی توپلو ائیلم (فعل مرکب): اسکی تورک دیلینده بئلهنجی ائیلملر هیز و سورعتی گؤرسه تمک اوچون ایشلهنیردی. اؤرنهیین (مثلن) : گلیوئردی = تئز گلدی ؛ آچیوئردی = تئز آچدی و ... .

4- یوغروق = پیلاستیک

5- سیمگه = نیماد علامت نیشان

6- خیژم = خشم چوخ عصبانیته دئییلیر.

7- تابلانماق = قبول اولونماق

8- دئدیک اوتو = خبرچینلر تهمت وورانلار

9- سورون = مسئله موشکول

10- چؤزهسی = حل ائدهنی

11- آتوشقا = پنجره

12- گؤرهو = وظیفه اینسانا تاپشیریلان ایش - تاپشیریق