منه یئریکلیینده نه یئدین آنا!؟ - ایبراهیم ساوالان

منه یئریکلیینده نه یئدین آنا!؟
         آلچا؟
                       آلما؟؟
یوخسا تندیرده قیزارمیش املیک قوزو اتی؟؟؟
آلچا یئسه یدین تورشا چالاردیم
آلما یئسه یدین شیرین اولاردیم
املیک قوزو اتی یئمیش اولسایدین
                                          سنله قالاردیم

منه یئریکلیینده نه یئدین آنا !؟

منده دؤرد ایز بوراخمیش او قوتسال یئمک
قارشی دوردوم حاقسیزلیغا
وورولدوم تورپاغا
دوغما کندیمدن آتیلدیم قیراغا
و سورگون یاشادیم نه نه !
و بوتون شهرلر دوغمالاشدی منه
منه یئریکلیینده آنام حاووا (حوا) یئمیشدی بوغدا

ایبراهیم ساوالان