آچیقمکتوب - سورقولار باشلاندی - 7

سورقولار باشلاندی

سئللولوم یاخین 250 اوزونو و 150 ائنی واریدی. یئره بیر پاممیق موکئت سالمیشدیلار. 4 مئتر بویو واریدی. 3 مئتیرلیکده بیر آچیشقا. بیر ایکی قات دمیر قاپی و قاپینین اورتاسیندا کیچیک بیر باجا کی ائشیکدن آچیلیب باغلانیردی و او باجادان باخماق یوسخا چاغیرماق ایچین قوللانیردیلار.

اوتاقچادا بیر ال یوماق اوچون داغ و سویوق سو شیری وارایدی. بیر قورآن و بیر جیلیدی جیریق مفاتیح الجنان کیتابی. گونده اوچ کره یئمک وئریلیردی. 209 – اونجو بند ایططیلاعاتین اولدوغونا گؤره یئمکلری چوخ یئملی و دادلی ایدی. چوخ ایحتیمالا گؤره ائشیکدن آلینیب گتیریلیردی. هفته ده بیر کره بالیق تویوق شینسئلی یئملی خوره کلر گؤبه لکدن و ....

 

توتولدوغوم گون ایسفندین 18 – ی ساحات 5 زادی دی کی اورا سالیندیم. پتولارین بیریسینی اوتاغین اوزونونا بئله سالدیم کی باشیم ایسیتیجی (فن کوئله) ساری اولسون. بیریسینی ده بوکوب بیر بالیش کیمی باشیمین آلتینا قویدوم. ایکیسینی ده اوستومه سالماق اوچون قاتلادیم و دالینا دایادیم. اوتاقدا اوچ دؤرد آددیم آتدیم. بیر آز اوزومو یودوم و سو ایچدیم. بیر آز ساکینله شدیم و قاپینین ساغ ورینده (طرفینده) اولان بیر قارا دویمه نی باسدیم. بو دوگمه زنگین دویمه سی دی و گودوکجو (گؤره وجی) نی چاغیرماق ایچین دیر. اونو باساندا ائشیکده بیر نارینجی چیراق یانیردی و بیر آزدان سونرا گودوکجو گلیردی ایشین دییب او دا هن دییب گئدیردی.

گودوکچو گلدی و من دئدیم توالئته گئتمک ایستیرم. دئدی گؤزلویونو تاخ چیخ ائشیگه. قاپینی آچدی و مندن ایسته دی سول ورین سونا قدر گئت و سول قاپینی آچ ایچری گیر. ایشین قورتاردی گؤزونو باغلا و قاییت اؤز سئللولان.

ایشیمی قورتاردیم و 18 آددیم ساییب اوتاغیمین آچیق قاپیسینا چاتارکن آدام او باشدان چاغیردی اوتاغینا گیرمه ائله دوم دوز گل کی سوروشدورماغا چاغیریلیبسان.

اؤزوم اؤزومه دئدیم: " نه تئز. قوی هله بیر اوتورایدیق!"

آدام قاباغا دوشدو و من اونون دالینجا گئتدیم. نئچه پیلله اندیک و بیر ایکی سالن آددیملاییب بیر اوتاغین قاباغیندا دور بوردا دئییب مندن اوزاقلاشدی. آزجا کئچدی و بیرینین الینی اؤز قولومدا حیس ائتدیم.

- گیر ایچری دئدی.

ایچری گیردیم و قولومدان یاپیشایاپیشا بیر صندلی اوستونده اوتورتدو. هئچ 88 اینجی ایلین صندللریله فرق ائتمه میشدی. کنکور سیناقیندادا بئله نجی صندلی اوستونده اوتوردورولموشدوم.

اوتوردوم و آدام گئری قاییدیب دالیمدا بیر باشقا ماسانین دالینداکی صندلی ده اوتوردو.

-    سن ماحمود اوجاقلوسان می؟

-    هن!

-    ایسفندین ایکیسینده هاردایدین می!؟

-    چوخ یئرده! سیز هارانی منظوروزدو؟

-    آنا دیلی مراسیمینده واردیدین می؟

-    هه!

داها سورغو اولمادی و بیلدیم کی سورقولاری یازیر. بیر آز گؤزله دیم.

کاغیذ و یازار قاباغیما قویولدو:

-    بو سوالا جاواب وئر.

دئدیم : - یازانمارام!

-    ندن!

-    منیم گؤزلویوم اولماسا یازانمارام. گؤزلریم چوخ ضعیف دی.

-    گؤزلویون کیمده دی؟

-    ایچری گلنده آنبار کیمی یئره آپاردیلار بیزی و اوردا بیر کیسه ایچینه ییغدیلار.

-    گؤزله گتیریم.

اوره ییمین تاپپیلتیسی چوخالمیشدی. گؤره سن او بیر یولداشلار نه یازمیشلار؟ بونا گؤره چوخ بیلردیم کی منیم آدیم او گونون قوناقلارین ایچینده دییلیبدیر. بیرده کی مامورلار اورا گلنده هامیدان فیلیم چکدیلر و ائله جه توتوقلاناندا ضابیطلرین الینده کی شکیل مراسیم گونونده کی شکیل دی.

بو قرارا گلمیشتیم کی او گونون باره سینده اؤزومه گؤره نه لر سوروشسالار دییه جه یم. من آچیق آیدین بو قونویا گؤره یازیرام و دانیشیرام. قورخولاسی بیر شیء یوخومدور. بونلاردان سووای نه سوروشسالارسا هئچ نه بیلمیردیم کی!؟

بو فیکیرلرده ایدیم کی آدام گلدی. دالیمدا دوردور و گؤزلویومو بیر دسمال ایله وئردی الیمه. گؤز یاغیمی بیر آز دا یوخاریا وئردیم و گؤزلویومو سیلندن سونرا گؤزومه تاخدیم و دسمالی جیبیمه قویدوم. سوالی اوخومادان اول کاغاذین باشلیغیندا اولان سوال لاری جاوابلادیم.

سورقولاما فورومو - ائوین ده

 

آردی وار

*******

   *)*)

بیرینجی بؤلوم  

ایکینجی بؤلوم

اوچونجو بؤلوم

دؤدونجو بؤلوم

بئشنجی بؤلوم

آلتینجی بؤلوم