آچیقمکتوب نه لری سوروشدولار!؟

آچیقمکتوب – نه لری سوروشدولار!؟

سورغوچولارین سوروشتورمالاری دانیشماقلا باشلانیردی سونرا  سؤزل (شیفاهی) اولاراق بیر سیرا سورقولار سوروشورلار. بو دانیشمالارین ایچیندن ایسته دیگی کیمی سورقولاری یازیلی (مکتوب) اولاراق یازیرلار. ایندی منیم قاباغیمدا ایلک سورقو یازیلمیشدیر:

- ایسفند آیین 2 – سینده (آنا دیلی موناسیبتینه گؤره) هاردایدینیز؟ نمنه یه گؤره اورا گئتمیشدینیز!؟ هاردان بیلدینیز اوردا ییغناجاق وارمی!؟ اوردا نه اولایلار باش وئردی؟

یازانی کاغیذا یاپیشتیردیم:

- او گون آنا دیلی مراسمینه گؤره بیر تؤرن کئچیریلمیشدی. بیر گون قاباق بهنام شیخی تئلفونلا تماسلاشیب اورا چاغیردی منی. گئتدیم. قورآن اوخوندو. شعر اوخوندو. آشیقلار چالیب اوخودولار. رقص قوروپو (آغا) رقص ائتدیلر. برنامه نین سونونا آز قالیردی سیزین مامورلار اورا گیردیلر. بیر آزدان آرواد اوشاقلارین قورخو قیشقیرتیسینا باخمایاراق مامورلارینیز قاپیلاری باغلادیلار. سونرا بیر شوشه سیندیرماق سسی گلدی. هامی ائشیک قاپیسینا ساری جومدولار. منده سونونجو آداملار ایچینده ائشیگه چیخدیم. اوردا بیبار و گؤز یاشاردیجی اینسی سی واریدی. بیلدیم نئچه نفر ده توتوقلانیب سیزین آرابالارا تپدیریلمیشدیلر. من اوردان گئتدیم.

بونلاری یازایازا سورقوچو منیم سول طرفیمده ائله دایانمیشدی. اونون پوتونلارینی گؤروردوم. بو قدر یازاندان سونرا اونا دئدیم توکندی. قاباغا گلیب ساغ آیاغین منیم صندلیمین قینینا قویدو. کاغیذی ماسانین اوستوندن گؤتوروب اوخودو.

- ائله بو!؟

-هه!

- یوخ بئله اولماز ها! بیزیم خوش رفتاریمیزدان سووای باشقا داورانیشیمیزدا وار. سنین بعض یولداشلارینلا باشقا نووع داورانمیشیق. اصلن ایسته میرم سنله ائله داوراناق. بیلیرم کی سن یاخشی اوشاقسان. آییله ن یاخشی و مذهبی آدامدیلار و آتان دا بیر زامان بیزینله امکداشیمیش. (منیم آتام پاسدارایدی و ایندی امکلی دیر)

سورقوچو منه اؤیوت وئرمه یه باشلامیشدی. منده قولاق آسیردیم. سؤزلرینده تهدیده آلقیش آجی یا شیرین قاتیردی. منه یاردیم ائتمک ایسته دیگینی بلیرله ییردی. منی دوز یولدان آزمیش اینسان تانیملاییردی. سونرا اؤز ماساسینین آرخاسینا گئدیب باشقا سورقونو یازدی:

- اوردا نه اولای باش وئردی!؟ بوتون اولایلاری یازین؟کیملر شعر اوخودولار!؟ آشیقلار کیملریدیلر!؟ سیزین اوینامیز (نقشیز) نه ایدی؟! سیز کیملری چاغیردینیزمی!؟ سیزین گؤره وینیز نه ایدی!؟

منده باشلادیم یازدیم:

-ایکی ایلدن چوخدور یولداشلاردان اوزاق اولدوغوما گؤره چوخ  شیء بیلمیرم. اورا  کیم یوخسا کیملر پیلان وئردیکلریندن خبریم یوخدور. اورا گلنلرین ده چوخونو تانیمیردیم. آنجاق من ایکی نفری چاغیرمیشتیم کی هر ایکیسی ده توتوقلانمیشدیلار. بیریسی " ک.خ.آ" ایسه قارداشی باشقاسی "علیرضا بابایی" ایدی. اونلاری تئلفونلا چاغیردیم. آدرسی اونلارا اوخودوم. اوردا شعر اوخویانلارین بیریسینی تانیدیم. اودا شاعیر "چوبان اوغلو" دور. بو تاخما آددیر. آد یوخسا سوی آدینی بیلمیرم. او تانینمیش بیر شاعیردی. باشقا شعر اوخویانلاردا ایکی خانیم ایدیلار آدلارینی دئدیلر آنجاق اونوتقان اینسان اولدوغوما گؤره آدلارینی خاطیرلامیرام. رقص قوروپونو دا تانیمیردیم. دئییردیلر تبریزدن گلیبلر. آشیقلارین بیریسینی ده تانیدیم. آشیق "صودیف" دیر آدی. اونلا اکبرآباد دا (نسیم شهرده) تورکجه – فارسجا  کیتاب سرگیسی قوراندا تانیش اولموشدوم. مندن آشیق کیتابی آلاردی. باشقا آشیقلاری تانیمادیم. اکبر بی آزاد دا اوردا دانیشدی. من اورا چاغیریلمیشتیم بیر قوناق کیمی. نسه بیر گؤره ویم زادیم دا یوخودور. آنجاق سس گوجلندریجی خاراب اولدوغو اوچون من اونون یانیندا اوتورموشتوم سسی دوزنلندیریردیم.

بو سورقولاریدا یانیتلادیم. سورقوچو کاغیذی مندن آلیب اوخوماقا باشلادی. بیر آز سسسیزلیکدن سونرا غضبلندی:

-من بئله دوشونوردوم سن یولا گله بیله جکسن! بو نه ایش دیر! سیزده کیشیلیک یوخدور! هامیسی دئییر بیز قوناق ایدیک!؟ بئله ایش اولارمی!؟ یازیق منصور (منصور فتحی) نه گوناه ائدیبدیر کی هر شیء سالیرسینیز اونون بوینونا!؟ سن تئهراندا اؤنملی چالیشقانلاردان سان! من نئجه اینانیم سن اوردا گؤره وسیز چاغیریلیب اوتورموشان!؟ او کاغیذلاری کیم یازمیشدی؟ دوورلارا یاپیشتیریلان پیلاکاردلاری کیم یازدیرمیشدیر؟ او برنامه نین قوروجولاری کیم ایدیلر؟ بیز بیلیریک او برنامه نین پیلانینا گؤره نئچه اوتوروملار اولوبدور!؟ سنده اوردا واریدینسا کیملر اولدوقلارینی بیزه یازمالیسان؟ یازاجاخسان یوخسا یاتمایاجاخسان؟

دئدیم:

- من سؤزل اولاراق سیزه جاواب دیینمه رم. لوطفن بونلاری یازین منده نه قدر ایططیلاعاتیم اولسا یازارام.

بیر آز ساکینلشدی و یازماغا باشلادی:

- آنا دیلی گونونو کیم بو آدایله و نه اوچون بئله آدلاندیریلیبدیر؟ سیزجه آیریمچیلار (تجزیه طلبلر) ندن بو گونو قوتلویورلار!؟

یازدیم:

- ایسفندین ایکیسی ب.م.ت (بیرلشمیش میللتلر تشکیلاتی) طرفیندن دونیا آنا دیلی گونو تانیتدیریلیبدیر. اودا بنگلادشلیلر و پاکیستان دوولتی آراسیندا اولان آنا دیل تارتیشمالاری سونوجوندا نئچه اؤیرنجی اؤلومونه گؤره؛ دونیا بو قرارا گلیر کی بو دیلی او شهیدلرین آنینا گؤره دونیا آنا دیلی گونو آدلاندیریلسین. بو گون بوتون دیللره آییددیر. فارسجا تورکجه عربجه کوردجه و ... دیللره ده شامیل اولور. هر کیمسه نین اؤز آنا دیلینین قارشیسیندا بیر اینسانی گؤره وی واردی. اونو قوروماق وظیفه دی. بیز اؤرگنمیشیک دیلیمیزین اوستونده جان وئرمک شهید اولماق کیمی دیر. بؤیوک اؤندیریمیز (آیت ا... خامنه ای) ده دیل قورونماسینا گؤره ده چوخلو بویروقلاری و اؤیوتلری وار. بو گون دونیالیق بیر گوندور. بونو کیمسه اؤز آدینا کئچه بیلمز. بو گونو عزیزله مک ده سوچ ساییلا بیلمز!

بو قدر یازدیم. سونرا یئمک قوخوسو گلدی. هه! شام اولموشدور. کاغیذی آداما وئردیم. اودا یئمک گتیرمیشدی و اؤزو یئییردی. من برک آجمیشتیم. ناهاردا یئمه میشدیم. منه تاعاروف ائیله دی. آج اولدوغوما گؤره هن دئدیم. باشقا بیر صندلی گتیریب بیر آز چؤرک ایسه یئمک گتیردی. سودا پیشیریلمیش یئرآلما گؤبه لک یئرکؤکو یاشیل لوبیا و ات خورگی ایدی. بیر آز چؤرک گؤتوروب باتیردیم. یامان دادلی ایدی. ایکی بلله یئمیشدیم ایچمه لی سو گتیریلدی.

سورقوچو سول طرفیمده دوروب بیرلیکده یئمک ییردیک. گئنه باشلامیشدی دانیشماغا. هر زاتدان دانیشیردی. اؤزو تورک اولدوغوندان؛ ائوین بازداشتگاهینین دادلی یئمه گیندن دییردی کی ائوده یئمک یئمیر آنجاق بورا گلیب بورانین یئمک لریندن یئییر. بیزلری یالانچی تانیتدیریردی کی: (( ائشیگه چیخیب دئییرسیز بیزی ایشکنجه ائتدیلر دؤیدولر آج سوسوز ساخلادیلار و باشقا یالانلاری بیزه یاپیشتیریب دییرسیز!))

نه قدر او دانیشیردی من او قدر چوخ ییردیم. بتر یینجیل اولموشدوم. ایحتیمال وئریردیم بو سوروشتورولما چوخا چکه جک و انرژی آلماغیم لازیمدیر. هله اوچ سورقو مندن سوروشولوب 3 ساحاتا یاخین دیر بوردایام. ظننیمجه سورقولارین یاریسی اولمویوبدور! یئمک قورتولدو. چای گتیردیلر. چایی دا ایچدیم. بیر چایدا گتیردیلر. اونودا ایچدیم. چایین قابینی قاباغیمدان گؤتورب سورقو کاغیذی قاباغیما قویدو:   

آردی وار

*******

   *)*)

بیرینجی بؤلوم  

ایکینجی بؤلوم

اوچونجو بؤلوم

دؤدونجو بؤلوم

بئشنجی بؤلوم

آلتینجی بؤلوم

یئدینجی بؤلوم