آچیق مکتوب - 10

بونو یازیب وئردیم سورقوچویا. بیلدیم راضی اولمادی. باشقا سورقو :

- سیزین آییریمجی ییغینجاغینیزدا گونئی آذربایجانین میللی مارشی آدیندا بیر کاغیذ یاییلیبدیر و قورآندان سونرا اوخونوبدور. بونون آنلامی ندیر؟

- من بئلنجی بیر زادی گؤرمه میشم. آنجاق او شعر کی سیز دییرسیز گنجلر ماهنیسی (ترانه جوانان) دیر. اونو هامی یئرده اوخویارلار. داغ دا باغدا و حتی چوخ اوخویانلار (مغنی لر) مثلن "رحیم شهریاری" ده اوخویوبدور. آنجاق بو آد کی سیز دئدیز من گؤرمه میشم و سیزین گؤرسه تدیگینیز کاغیذدا گؤردوم.

- نئجه کی بیلیرسن بیزیم رسمی یازی آلفابئتیمیز فارسجا آلفابئتیمیزدیر. سیزجه بو آلفابئتدن سووای لاتین آلفابئت (کی آذربایجان جومهوریتینده قولانیلیر) دن قوللانانلارین آماجی ندیر!؟

- فارسجا آلفابئت کی سیز دییرسیز عرب رسم الخط تیندن آلینیبدیر و بیز آزربایجان تورکلری ده اوندان قوللانیریق و آدینی تورکجه آلفابئت قویموشوق. بو یاخشی دیر. آنجاق لاتین آلفابئتی اؤرگنمه ییده یاخشی بیلیریک. هم اوتایداکیلار بیزیم یازدیقلاریمیزی اوخوماق اوچون و هم بیز اوتای یازارلارین یازیلارینی اوخوماق اوچون. دیل بیردیر. یازی آلفابئتی چوخ اؤنملی دگیل. بیزیم دیله هر هانسی آلفابئت راحات اولسا اوندان قولانماق حاققیمیزدیر. ایستر لاتین ایستر عربجه یوخسا باشقا یازی قورولوشلاری.

- سیز حاضیرسیز او آداملاردان کی فیکر ائدیرسیز میللی حرکته خیانت ائدیرلر و تجزیه طلبدیرلر؛ شیکایتجی اولوب و بیزه اونلارین جزالاندیرماسینا یاردیم ائده سیز؟

- هن! حاضیرام.

سورقوچو بونو اوخویاندان سونرا بیر آز سئویندی.چالیشتی بعض توتوقلانلاری چئشیدلی یوللارلا آییریمچی و خائن کیمی تانیتدیرا و مختلف سندلر گتیردی. سونرا مندن ایسته دیکی اونلارین علیهینه شیکایتجی اولام! منده دئدیم:

- بونلار سیز دیین سؤزلردی. من ایمانیمی یاندیرمارام و تانیمادیغیم اینسانی سوچلو سانمام.

- یانی سن اینانمیرسان فیلانکس اسرائیل جاسوسودور و اسراییل سرویس ایله آذربایجان جومهوریتینده گؤروشوبدور!؟ سن کی چوخ یاخیندان جریانداسان!؟

سورقوچونو بارماق قویدوغو یئر دومدوز 88 – اینجی پرونده اوستونده ایدی. دئدیم:

- استناد ائتدیگینیز سؤز بیزیم 88 – اینجی پرونده سیدیرسه بیلیرسینیز بیز اونا گؤره برائت قازانمیشیق و داها یاخشی بیلیرسیز بیزدن باسقی و زوراکیلیقلا او سؤزلری یازدیرماغا مجبور ائتدیلر. نئجه کی دوسیالاردادا وار.

- من سنه سؤز وئریرم کی من او دوسیانی یئنیدن قالدیراجاغام و  بو پرونده ایله بیرلیکده آغیر جزایا محکوم ائتدیره جم سنی!

سورقوچو بئله دانیشیردی کی ائله بیل اؤزو قاضییدی. دییه سن هر شیء اونلارین الینده ایدی!؟

نئجه کی دییرلر تاریخ تیکرار اولار؛ دییه سن یئنه ده 88 دیم. او زامانکی سورقوچودان داها خبر یوخدور. اونا " کنتوراتچی" آدی وئریلمیشدی میللتچیلر وریندن. تئهراندا توتوقلانان میللی چالیشقانلار ایللر بویودور بو آداملا تانیشیدیلار. 1390 ایلینه قدر توتوقلانانلارین چوخو اونون اللری آلتینا گیریردیلر. یاشلی بیر کیشی ایدی. گؤزلویو واریدی. بویو منیم چیگنیمدن ایدی. کؤکویدو ساچلاری آرابیر آغارمشیدی. او زامان بیر قارامتیل پژو ماشینی واریدی و تئهرانین شمالیندا اوتوراردی. او زامان سورقولار بئله ایدی کی چالیشقانلاری تانیماق اوچون توپلانیردیلار. آنجاق ایندی سورقولار تام فرقلنیبلر. سورقوچولار ایستیرلر آداملاری تشکیلاتلارا باغلاسینلار.

آردی وار

*******

   *)*)

سککیزینجی بؤلوم

دوققوزونجو بؤلوم