دونیا آنا دیلی گونونو اونوتمایاق

" دونیا آنادیلی گونو" نو اونوتمایاق ! - حسن راشدی

اجتماعی شبکه‌لرین گونو گوندن گلیشمشه‌سینی دونیانین بو گونکو دورومونون بیر ضرورتی حساب ائتسَک‌ده ، اونون ضررلرینی ده گؤز اؤنونه آلمالییق .
بو شبکه لردن دوغرو - دوزگون یولدا استفاده ائتمه‌سک ، اوندان فایدالانماغی یالنیز بیر اویونجاق حدّینه ائندیرمیش اولاریق و چیگنیمیزده اولان آغیر میلّی وظیفه لری اونودوب اونون یئرینه باشیمیزی اویونجاغا بنزَر ایشلرله مشغول ائتمیش اولساق چوخ اودوزموش اولاریق .
" دونیا آنادیلی گونو" نه یعنی فوریه‌نین 21 ی و اسفند آیی نین 2 سینه یالنیز 26 گون قالدی ، بیز ائله بو گوندن باشلایاراق آنادیلی گونونده و بوتون شهرلریمیزده بو گونله باغلی برنامه‌لر کئچیرمه‌یه لازیمی ایشلر گؤرمه‌یه اقدام ائتمه‌لییک .
بیز مدنی یولدا چالیشماغیمیزی ثابت ائتمک اوچون آنادیلی گونونده و هئچ بیر سیاسی موضوعا قاتیشمادان یالنیز " آنا دیلی " ایله باغلی برنامه لر کئچیرمه‌یه مجّوز آلماق اوچون بوتون شهرلریمیزده مسئول ادره‌لره ( فرمانداری ، ارشاد اسلامی و یا ... ) گئدیب موجوز آلماغا اقدام ائتمه لییک ؛ اگر بو آچیق - آیدین تقاضامیزا مثبت جاواب وئریلرسه " آنا دیل " حاقّیندا و آرام بیر فضادا برنامه اجرا ائتمکدن یاخشی نه اولا بیلرکی ! 
اگر بو حُسن نیّتلی ایسته‌ییمیزه مثبت جاواب وئریلمه‌سه ، حاق سسیمیزی دونیایا یایماق بیزیم وجدان بورجوموزدور.