«من، من دَییلمیشم»، حکایهسیندن کیچیک بیر بؤلوم.

«من، من دَییلمیشم»، حکایه‌سیندن کیچیک بیر بؤلوم.

دئدی: «دوهتور، اوره‌ییم باشیما وورور، باشیم اوره‌ییمه؛ بولمورم هانسی هانسیندان بتر آغریییر. ایکیسینین ده آغریسی گلیب یاتیر قولاغیمین ایچینده. قالیرام هانسی حئیوانین سسی‌نن آغریمی باغیریم. بولمورم ایت کیمی هورویوم، قورد کیمی اولویوم، آت کیمی کیشنه‌ییم!»
دوکتور اوتوسکوپی گؤتورب، ایسته‌دی آلکلا بولاشمیش پامبیق‌‌لا اوتوسکوپ-ون باشینی سیلیب، اونون قولاغینا باخسین. آلکل اییسی هدایتین حساس بورنونا توخوندوقدا، هدایت قفیللدن اوزاندیغی ماینا تختینین اوستوندن سیچرادی. دوکتورون الیندن توتوب، دئدی: «دوهتور آلکل وورما! مه‌یه بولموسن؟!» 
دوکتور قاشلارین ییغیب دئدی: «آی جانیم، بونون باشینی آنتی سپته ائله‌مه‌سم، قاباقکی ناخوشون قولاغینین میکروارگانیزم‌لری سنین قولاغیوا بولاشار» 
جهنم اودو کیمی آلکل‌دان قورخان هدایت، دوکتورون سؤزونو یاخشی دوشونمه‌سه ده، اؤز ایسته‌دییی کیمی بیر شئی‌لر باشا دوشدو. آنجاق، آلکلا بولاشمیش پامبیق تیکه‌سی، تیکان کیمی گؤزونه باتدی.
- «دوهتور، ده‌وه همیشه قوز سیشماز، منن قاباخکی ناخوشون دا قاداسی منیم جانیما، منی گوناها باتیرما، بولوسن کی آلکل حرامدی!» 
دوکتور بو گونه‌جان هدایت کیمی ناخوشا راستلامامیشدی. هدایت دانیشماسایدی دا، سیر- صیفتی یئترینجه دوکتورو عصب‌لندیریردی. 
- «دوهتور، سنی او آلـلاهین، سن فقط باخ گؤر منیم بو قولاغیمدا آت بالالیییب، ایت بالالیییب، قورد بالالییبب، دئه من اونون سسی‌نن آغریمی باغیریم»...

رقیه کبیری