یانیق توخوملار

یانیق توخوملار(حیکایه سی)

یادیمدادیر آتام کرپیج ایشینده اولاردی و سحر تئزدن گئده ردی وآخشام چاغی ایشدن قاییداندا ،اوستو باشی توزلواولاردی، منده هر گون قاباغینا قاچاردیم کی منی قوجاقلاسین آمما اودا الینی اوزالدیب چیینیمدن توتوب دئیه ردی بالا مندن اوزاق دور، اوستون باتار و سن ده منه تای اولارسان ،منده سویو سوزولموش قاییداردیم.آنام دا گونده کی کیمی الینه بیر سوپورگه گؤتوروب و قاپی آغزیندا آتامین توزونو آلاردی کی بلکه توزلو-توزلو ایچه ری گیرمه سین.آنام اؤزوده ساتدیق چؤره ک یاپاردی کی آتاما یاردیم جی اولسون بلکه بیرلیکده اون باش عایله نین باشینی دولاندیرسینلار، اونا گؤره بیزیم تندیریمیز همه شه یوخسول اوره یی کیمی کؤزه ریب و ایستی وئرردی، قونشولوغوموزدا بیر ایکی کئفی ساز واریدی کی گونده کی گونده شوربا بارداقلارینی بیزیم تندیرین دوواغینا آساردیلار و دئیه ردیلر کی تندیر شورباسی تاملی اولور،بیزده هر گون ساده جه اونلارین ات شورباسینین قوخوسونا اوماردیق، آمما بیزیم سوغان سو شوربامیزین بارداغی دا اونلارین بارداقلاریلا یان- یانا قایناردی و سئرریمیزی آچمازدی، آخی تندیرده هر بیر شئی آغزی قاپاقلی اولار.

ائویمیزین آستاناسیندا بیر دوندوروجو واریدی کی فقط کئفی سازلارین اوره یینی سرینله دردی.قونشولار بوز قابلارینی اونا قویاردیلار و آناما دئیه ردیلر آی قیز ماشاالله سنین یاخچالیندا بوش یئر چوخ اولور،بیر اوزه رریک باغی دا همه شه ائوین اورتا دیره ییندن آسلاناردی کی نظر دیمه سین.تاخچامیزدا دا ایکی دنه بؤیوک موهور واریدی کی اونلارا باخاندا آجیخاردیم و آق بوقچایا بورونموش بیر کیتاب  کی بیزی آنا اؤپوشونه حسرت ده قویموشدو.قونشولوغوموزداکی کئفی سازلارین بیریسینین میرتان آدلا بیر اوغلو واریدی کی بیر اوخولا گئده ردیک و هر گون بیر بال بلله سی گتیرردی و میسیلدایا-میسیلدایا منیم قاباغیمدا یئیردی و منه وئرمزدی ،منده اوخول کیتابلاریمی چئینه یه ردیم.بیر گون آناما دئدیم آنا منه ده بال کره بلله سی قوی آپاریم اوخولدا یئییم یازیق آنامدا او گئجه سی بیر بلله بوکدی و منه دئدی بال- کره بلله سی دیر آما گوناه دیر ایچینی آچیب باخمازسان، منده بلله می آپاردیم اوخولدا میرتان لا برابر یئدیم، دئمیرم بال کره تامی وئریردی آمما هردن خیرچیلداییردی،سونرالار بیلدیم چؤره یین آراسینا نوباتی یاغینی یاخیب و اوستونه قندین خکه سینی سپمیشدی.نه باشینیزی آغریدیم،بیر گون آناما دئدیم:آنا بس میرتان گیلین ائوینده ندن تانری یادا دوشمور و ساده جه بیزیم ائوده تانری نی چاغیریریق نم تانری کریم دی ،تانری اؤزو بیر فرج یولو آچسین.آنام گولومسوندی و باشلادی باشیمین بیتینی دؤشورمه یه.شام چاغلاری دا، اولار- اولماز بیر شئی یئیه ردیک و هامی میز بیر ائوده یاتاردیق،آنام دئیه ردی بالا دای ییخیلین یاتین و گؤزلرینیزی یومون، آتانیز یورقون اولور،من ده هردن اونون کوره یینی اوورام بلکه یورقونلوغو چیخسین.یادیمدادیر بیر گئجه قوپاراق دوشدو و آنام یئر ایچینده آتاملا قارپیشدیلار، دئمه او اووماقلارین بیرینده،اوشاغی نننیه سالان کیمی آتامی یورقونلوقدان یوخو آپاریر و گئجه یاریسی آنام آتامین سینه سیندن بیر شاپالاق ویریر و دئییر دور جهنم اول سندن ده بیزه ار چیخمادی.بیزده قورخا-قورخا اوزاقدان باخیردیق و یوخولو-یوخولو آغلاییردیق. آنامدا اوز چؤندردی بیزه ساری: زهری مار اوشاق داکی یوخولو –یوخولو توتولدی وآتانین آرخاسیندا کوره ده یاندی و آنا قارنیندا تندیر قیراغیندا،همشه گودوکچی اولار و هئچ واقت دا آییلماز، سونوندا دا سیزین کیمی یانیق توخوم اولار ،یانیق توخوملار.

یوسف جوادی-یای 1394