پئیس مئیکئر[1] جیهازینی اوواردان اینسانا سایغی
هانسی بیر یایلادان[2] اوُزانیب بو اَل
گلیب هاراییما، هاییما منیم
اوُزاقدان اوُزاغا یاشیرام سنی
ماویلیک قاتیبسان پاییما منیم
ایندی بو سینمده دؤیونن جیهاز
سنین اللریندیر اورهک آدینا
دنیز آراسیندا سینان قاییغی
چکیبسن ساحیله کورهک آدینا
هاردا اورهییمه دولسا بیر باهار
اَسهجک زیروهمده چیچک اللرین
باهار سنینکیدیر، من بیر قوناغام
منیم اورهییمدن گؤیچک اللرین
نه سنی تانیرام، نه ده سن منی
عومرومده اَل اَله وئرمهدیییم دوست
باغریما باسیرام اوُزاقدان سنی
هئچ زامان اؤزونو گؤرمه دییم دوست
"ارشد نظری"
بو شعری ارشد نظری جنابلاری اوره ک خسته لیگین کئچیرندن سونرا کی لازیم اولدی پئیس مئیکئر (ضربان ساز)وسیله سینی اوره یینه یاردیمجی اولماغا گؤره سینه سینده قوشولسون او وسیله نی اوواردانا یازدی و من ده یازدیغیم شعری پئیس مئیکرین اؤز دیلجه ارشد نظری جنابلارینا یازمیشام و "علامت اولان میصراعلار ارشد نظری جنابلارینین اؤز شئعیرلری دیلر کی یازدیغیم شئعیرده گتیرمیشم
پوچاتلی قوتودان قورتاردی منی
سئوگی مه جان وئردی اوره یین سنین
محببت میدالین تاخماغا منی
خالقا نیشان وئردی اوره یین سنین
بوینوما آلمیشام دوزه لن گوندن
سینان اوره ک لرده یاشایام گره ک
خسته یاتاغیندا یاتان اینسانین
هر ان یاشامی نی اوخشایام گره ک
من سنی سئویرم سنین سیننده
گولورم سنده بیر گولومسه یه نده
کدرلی اولورام سن داریخاندا
منیم ده اوره ییم دؤیونور سنده
اوره یین آچیق دیر هردن باخاندا
"اوشاقلار اوینایان دوارسیز مئشه"
"گوللر کپه نه یه ازیلمکده دیر"
قونچانین گؤز یاشین سیلیر بنؤوشه
سنین اوره یینده نه لر واریمیش
قیامت اولسادا هر نه یئرینده
گؤرنه گئنیش دی بیر دونیا یاشاییر
یاریلمیش اوره یین دورت دن بیرینده
سؤز وئریبسن منه باها مئوسیمی
من یاشیل یارپاغام بیر بوداق اوسته
تورپاغا دوشنده اؤزون دئییبسن
"یاپیش اوره ییمدن دور آیاق اوسته"
یوسف جوادی