دوه باشین سوخار پامبیغا دئیه ر کیمسه منی گؤرمه ییر(حیکایه)

آخشام چاغی ایدی یورقون -آرقین ایشدن ائوه گلدیم.ایشین یورقونلوغو بیر یاندان و آیلیق لارین وئریلمه مه سی اوبیری یاندان، نه بیلیم ایشدن چیخارتماق مسله سی  و نئچه بونا تای مسله بئینیمی قاریشدیرمیشدی ائله کی قیزیمین گونده کی کیمی قاپی دالیندا دوروب و قاپیدان کئچنده منی قورخوتماسینی بیلمه دیم.هر حالدا ائوه کئچدیم و پالتارلاریمی دئییشیب اوتوراندان سونرا گؤردوم خانیمین گؤزلری دولوبدو.دئمه لی یم کی خانیمیم اؤنجه ایلک اوخولدا اوشاقلارا اؤیرتمن دیر(مربی پیش دبستانی)کی آیدا ساده جه 150000 تومن آیلیق لاری دیر کی اونون دا 60000 تومنی فقط ماشین کیراسینا گئدیر و آیدا 10 گون سیقورتا(بیمه) تؤکولور کی 8 آییلان حئسابلایاندا ایلده 3 آی سیقورتا اولور و دؤلت اوخولوندا رسمی اؤیرتمنلریلن بیر اوخولدا درس دئییرلر.

 نه باشینیزی آغریدیم گؤزلرینین دولماسینین سببینی سوردوم باشلادی دئدی:بو گون مدرسه حایاتیندا دولانیردیم و سیاحات زنگینده اوشاقلاری قورویوردوم کی اوینایاندا ییخیلماسین لار.بیر آن گؤزوم ساتاشدی اوخولون سوپورونه ،کی الینده بیر دسته کاغاذ وئردی منه و دئدی زحمت اولماسا ایچه ری گئدنده بو آیلیق فیش لرینی مدرسه نین مودورونه وئررسن و سونرا گئتدی و مدرسه نین مودورونون فیشی کی هامی سیندان اوسته ایدی گؤزومه دئیدی گؤردوم آیلیغی 2760000 تومن کی حئسابلایاندا منیم 2 ایل تامام آیلیغیم اولور هله اونودا چکدیگی زحمتلرینه گؤره اونلاری موتلو ائله مه ییر. چون باهالیق دیر.اونا گؤره گون اورتا چاغی اوخولدان چیخاندا آموزش پرورش ایداره سینه باش ویردیم وایلک اوخولون مسئولونون یانینا گئتدیم و دئدیم :من الان یئددی ایلدی لیسانس سندینن بو اوخولدا درس وئریرم و آیدا 80 مین تومنیله باشلامیشام و ایلده 10 مین تومن آیلیغیمین اوستونه  آرتیریبلاروایندی ده آیدا 150 مین تومن آلیرام کی اونودا دولت وئرمه ییر بلکه میللتین اؤزوندن  آیلیق ییغمیشام. هله اونودا امک داشلارینیزدا بیریسینی قویوبسینیز اوردا کی او پولو بیزدن آلیر نئچه فاییزین بیزه وئریر و قالانینی الینی آغدا قارایا ویرمادان جئبینه قویور.منده30 نفر اوشاغین باشین دولاندیریرام  و اونلارا درس وئریرم کی هره سی گله جک ده مملکتیمیزین بیر دایاغی اولاجاقلار و ایلک الیفبانی دا من اونلارا اؤیره دیرم گؤرون هئچ اینصاف دان دیر. قاییتدی بئله  دئدی:خانیم بودوکی وار ایسته مه ییر سن الدن سال ،الان ائشیکده مینلر نفر وار کی یالواریرلار آیدا 100 تومنه گلیب درس وئرسینلر و منده گزینش کاغاذیمین باطیل اولماماغینا گؤره اعتیراض ائله مه دیم و سویو سوزولموش قاییتدیم.

قیزیم کی بو سؤزلری ائشیدیردی اویاندان دئدی:خوب آنا سنده اوردا الینی آغدان  قارایا ویرما.خانیمیم دئدی: یوخ بالا اونلار آغ قارا دئییل لرکی، اونلاریلان سنین منه فرقینیز یوخدو،اونلار گوناهی نه و اوره ک لرینده هئچ بیر زاد یوخدور.بیری سی دئیه ر خانیم من بؤیویندن سونرا دوقتور اولاجاغام و سنین یارالارینی توخداداجاغام و او بیریسی بیر داها گله جک دن دئیه ر،آنجاق هره سی بیر اومودیلان منی یاشادیرلار. سونرا خانیم نه بیلیم آخی دئییب گئتدی گونده کی کیمی اوتاغیندا ایکی اوچ ساعات اؤیرنجی لرینه اویونجاقلارینی دوزلتمه یه .ایندی هر یئره باخیرسان بوجوردی من اؤزوم ده بو ایشده قالمیشام نئجه کی:دوه باشین سوخور پامبیغا بیر اوجدان یئییر و دئییر کیمسه منی گؤرمه ییر.

یوسف جوادی