رخشنده خالانین طوطی سی(حئکایه طنز)

بیر گون آخشام چاغی یامان یئل اسیردی.قاپی پئنجره قودوز ایت کیمی گلیب گئدنه هوروشوردیلر ، توز تورپاق هر یانی بوروموشدو.بیردن بیره شیمشک شاخدی ، یاغیش یاغماغا باشلادی ، هر یانی چیمیزدیردی.سونرا گونش یاواش -یاواش بولودلاری اوووددو.خانیم منی چاغیردی دئدی:آی کیشی تزه چای دمله میشم.هاوادا سریندی ،گل اوتوراق بولقوندا بیر ایستیکان چای ایچک بلکه جانیمیز قیزسین.منده آستاناداکی جئجیمی گؤتوردوم و بولقونا سردیم.بلکه اوستونده اوتوراق.خانیم چایی تؤکه-تؤکه دئدی:آی یئتیم نئجه بیزیم ده بیر اوشاغیمیز اولمادی،باشیمیز اونا قاریشسین بلکه داریخمادان قورتولاق.منده بو یاندان خانیما اومود وئریردیم کی حایاط قاپیمیز دؤیولدو.سسله دیم کیمدی او؟جاواب وئردی منم رخشنده آچین قاپینی.خانیم دا قاپینی آچدی.گؤردوک رخشنده خالا الینده بیر قفس ایچه ری کئچدی دئدی بالا بو طوطی نی رحمتلیک کیشی نئچه ایل بوندان اؤنجه آلمیشدی.ایندی ده بونون سسی منی اینجیدیر.دئدیم ائله سیزین اوشاغینیز یوخدو.بو طوطی نی آلین ساخلایین بلکه باشینیز قاریشسین.بیزده سئوینه جک طوطی نی آلیب و ساغول دئیه ندن سونرا. قفسی آستاناداکی دیرکدن آسلادیق.طوطی اول گونلر فقط دئییردی قارا یولا گؤ یولا.آمما سونرالار ره به ره سؤووشلر اؤیرندی.ائله کی داها قارا یولا گؤ یولا یادیندان چیخدی. گون او گون اولدو خانیم منی یاخالادی و دئدی:کیشی قونشولوغوموزداکی حاج عابوللانی کی تاناییرسان.نئچه ایل بوندان اؤنجه خانیمی سی دا آللاهین رحمتینه گئتدی.قونشولار دئییرلر اونون نفسی یامان آغیردی.گؤرسون دئیه رسن بیزه بیر دوعا یازار،بلکه اوشاغیمیز اولسون.منده اونون سؤزیله مچید یولوندا حاج عابدوللانین قاباغینی کسدیم و اونا سؤز آچدیم.اودا قبول ائتدی  گلدی ائویمیزده بیر دوعا یازدی و چالخالادیق بیر کاسا سویا و خانیملا بیر لیکده ایچدیک.سونرا حاج عابدوللایا ساغول دئدیک آمما او بونا راضی لاشمادی و بیزدن شیرینلیک ایسته دی.بیزیم ده کی الیمیز بوشودو.طوطی نی  بیزدن آلیب آپاردی.یئنی دن بیزه بیر داریخماق ال وئردی و نئچه موددت ساخلایاندان سونرا طوطی نی قایتاردی اؤزوموزه  دئدی:بالا بو سوزلر نمنه دی بو قوش دانیشیر.اولده نئچه موددت پیس-پیس سؤزلر دئییردی. و منی قوناقلار ایچینده خجالات ائله ییردی آخی منیم اؤزومه گؤره خالقین ایچینده عیززت –احتیرامیم واردی.سونرالار دا کی هئچ بیر زاد دانیشماییردی و فقط منه باخیردی.آلین بو طوطی نیزی سونرا سیزیلن حئسابلاشارام.بیزده سئوینه جک طوطی نی آلیب گتیردیک ائوه.آمما طوطی اوندان سونرا هئچ بیر زاد دانیشماییردی. و هر نه ایش گؤرور دوک فقط دئییردی استغفورواللاه.بیرده گئجه لر یاتاندا چیراقلاری سؤندورندن سونرادئییردی قارایولا گؤ یولا ،استغفوروللاه.

یوسف جوادی-13/8/94