آچیق پئنجره(حئکایه)

قیشین شاخدالاریندا،قار- شپه، یئری- گؤیو بوروموشدو.یئر اوزه رینده کی دن-دوشلر قار آلتیندا قالمیشدیلار.حیات باغچاسی نین قوشلاری اؤزلرینی کول-کوسا چالیردیلار،بلکه بیر شئی تاپسینلار قارینلارینی دویورسون.آمما هئچ قارالتی گؤرسنمه دن،قو دئییردین قولاق توتولوردو.بولودلار قارملفه لرینی  سس سیزدن ،بویدا-بویدا آغاجلارین اوستونه چکیب اونلاری اویدورموشدولار.قوشلارا اومود یولو قالمامیشدی.باغچانین کناریندا بیر گؤزه گلیم ائو واریدی.ائوین اوتاق پئنجره سی باغچایا ساری آچیلیردی.اوتاغین ایچری سینده نئچه قفس دوواردان آسیلمیشدی و قفسلرین هامیسی بوشویدو،یالنیزاونلارین بیرینده بیر قناره واریدی.ائو صاحاب قناره نین قفس قابلارینی آغیز- بوغوز یئمکلردن دولدورموشدو،و ائشیکده کی بوداقلارا قونان قوشلار،اوتاغین پئنجره سیندن قناره نین ایستی قفس ده یئییب ایچمه سینه حسرتیلن باخیردیلار.بیر گون ائو صاحاب قناره یه دن تؤکندن سونرا قفسین قاپیسینین اؤرتمه سی یادیندان چیخدی و اوتاغین هاواسی دئییشیلمک اوچون پئنجره نی آچیق قویدو.و او بیری ایشلرینی گؤرمک اوچون اوتاقدان چیخدی.آمما چوخ زامان چکمه دی یادینا دوشدو قفسین قاپیسینی آچیق قویوبدو.قناره نین اوچوب گئتمه سینین قورخوسوندان،تلسیک اوتاغا ساری قاییتدی.اوتاغین قاپیسینی آچمادان قاپینین آراسیندان،گؤزلری دووارداکی قفسلره ساتاشدی،گؤردو اؤز قناره سی اوچوب گئتمه میشدی هئچ،او بیری قوشلار ایسه قفس لره دولموشدولار.بیر بیرینه ماجال وئرمه دن ،قفس قابیلاریندا قالان دن –سودان یئییب ایچیردیلر،کیمسه نین زورو چوخ اولسایدی.اوبیری قوشلاری قفس دن قاوماغا چالیشیردی.ائشیکده دایانان قوشلار اولده ایچری دولماقدان چکینیردیلر.آمما آجیخدیقلارینا گؤره ،گؤزله یه ره ک ایچری گئچیردیلر و چاره سیزلیکدن اوبیری قوشلارا آمان وئرمه ییردیلر.ائو صاحاب بو صحنه نی گؤرندن سونرا پئنجره نی همه شه آچیق قویاردی.آخی باهار گلنه ده ک چاراسیز قوشلارا قفسده یاشاماق هر یئردن راحات ایدی .و قیشین شاخداسی اونلارین سومویونه ائله اوتورموشدو داها باهارین گلمه سینی دوشونه بیلمه ییردیلر.

یازار:یوسف جوادی