کئچمیش خاطیره
بایرام آیی ایدی.یولداشلیغان هامی میز بئکاریدیق و کندین کوچه لرینی آددیملاییردیق.کیمسه نین جئبینده بیر قیران پول یوخویدو.باش قاتماغا هئچ بیر زاد قالمامیشدی.اونا گؤره اوشاقلاریلان قرارلاشدیق سحر تئزدن گون چیخمامیشدان.بیرلیکده بئل- کولویو گؤتوره ک و کندین یاخینلیغیندا،قارا کؤهول آدیندا بیرخارابا کند واریدی کی چوخ کئچمیش زاماندان قالیردی.گئده ک و اونون کؤهنه قبریستانیندان قیزیل آختاراق.وساییل لری گؤتوروب آلا قارانلیقدا یولا دوشدوک.هر یئر خلوت ایدی.قو دئییردین قولاق توتولوردو.ساده جه یول قیراغیندا سوروجولر گئجه دن ماشینلارینی نوبته قویوب و سحر تئزدن موسافیر داشیماق اوچون گئجه نی ماشینلاریندا یاتمیشدیلار.هلهنه باشینیزی آغریدیم.قورخا- قورخا، گئتدیک قارا کؤهوله چاتدیق.قبریستا نا یئتیشنده هاوا بیر آز ایشیقلانمیشدی.گدیگین دؤشونده بیر قبیر واریدی.اونو لاپ قبریستانین گؤزونده قویلامیشدیلار.و تزه-تزه اوستونده قار چیچه یی بیتمیشدی.تاماهلاندیق و قبیری قازماغا باشلادیق.بو بیر دنه اوبیری لردن فرقی واریدی.تورپاغی پار پار پاریلدیردی.ساده جه سوموک لری قالمیشدی و سوموکلردن بللیدی بیر گنج قادینین اؤلوسو دیر.ائله بیل تورپاقدان اوتانیردیق اودا بیزدن.باشینین اوسته بیر تاختا داش واریدی اوستونده ایکی دنه دلیک یونموشدولار.بابامدان ائشیدمیشدیم.کئچمیش زامانلار آداخلی لاری قویلایاندا اونلارین آداخلیلیق اوزوکلرینین هره سینی بو دلیکلرین بیریسینه قویارمیشلار و اؤلن آدامیلان بیرلیکده قویلایاردیلار.دلیک لرده ایکی دنه قارالمیش بالاجا اوزوک واریدی.بو صحنه نی گؤردوک دن سونرا هامی میزی قهر باسدی و هئچ بیر زادا ال دیمه دن تورپاغی وئردیک اؤلونون اوستونه و ائوه ساری قاییتدیق.سونرا او گئجه نه قدر ائله دیم یاتامادیم و بو شعیری او گلینین دیلیجه یازدیم:
اوستوم آچیق قالدی یاراما باخ گئت
ساچیم اؤزگه نین دیر داراما باخ گئت
نیشان اوزویومو آراما باخ گئت
ارنلر قبریمی قازدیلار بلکه
سئوگیمدن بیر سطیر یازدیلار بلکه
اوستومو باسدیرین یورقونام یاتیم
جان سیز بدنیمی تورپاغا قاتیم
قویمایین چاراسیز گوناها باتیم
مزاریم اوستونده گزدیلر بلکه
سئوگیمدن بیر سطیر یازدیلار بلکه
فلک قالاییبدیر داغ داغیم اوسته
قوی یاغیش چیله سین تورپاغیم اوسته
چیچک لر سریلسین یارپاغیم اوسته
اوشاقلار آرابیر دوزدولر بلکه
سئوگیمدن بیر سطیر یازدیلار بلکه.
یوسف جوادی
ترکی آذربایجانی
تورکجه شعرلر
حکایت لر
اعضای انجمن(160)
usef1 )
خانه
مطالب(202)
دوستان (102)
گالری تصاویر (144)
کلیپ‌ها (13)
نظرسنجی (1)
چگونگی درج آگهی در سایت و قسمت تبلیغات
سایت و اپلیکیشن آموزش زبان انگلیسی urg.ir
تلگرام 
فیسبوک
تویتر