دلی قیز

27 یاشیم واریدی.آنام و باجیلاریم منی ائولندیرمک اوچون هر قاپی یا ائلچی گئدیردیلر،یوخ جاوابی نی ائشیدیردیلر.کندده قاپی قالمامیشدی گئتمه میش اولسونلار. هردن ایسه اوچوده بیر زاماندا هره سی بیر قاپی نی دؤیوردو.آنجاق منه گلن اولمادی.منده بو دورومدان اینجیمیشدیم و باغیمیزدا بیر دنه ایکی مرتبه دام واریدی اورادا تک باشیما قالاردیم.دامیمیز کرپیجدن ایشلنمیشدی.آلتینی طؤوله ائله میشدیک و اوستونون یاریسی اوتاغیدی و یاریسی بالکون اونوندا اوزو باغا ساری آچیلیردی.باغ دا نه باغ ،اوجو بوجاغی بیلینمه ییردی.یای- یاز اولاندا یارپاقلار یئری –گؤیو بورویردی آغاجلار ره به ره گوللردن سوسنمیشدی .گوندوزلر اوخوجو قوشلارین سسی ،گئجه لرایسه گؤلوموزده کی قورباغالارآدامی کئفلندیریردی.باغیمیز کندین گون باتان تاییندایدی.باغین کناریندا کندین بولاغیندان گؤزیاشی کیمی سو آخیردی و اته گینده ایشلنمیش قوشا حووضا توکولوردو.هردن بولاقدان سو گتیرمه یه گئدنده.بولاق باشینداکی قیزلارمنه ائولنن مه دیگیمه گؤره باجی دئیه ردیلر و هره سی بیر متلک آتاردی.بیریسی دئیه ردی خان ننم تک باشینا قالیر گوناه دی گل اونونلا قال.بیریسی دئیه ردی عنبر ننه قوجالیب ثاوابی وار آپار اونو اؤزونله ساخلا.آنجاق منده هئچ بیر زاد دئمه دن سویو سوزولموش قاییداردیم.هردن ده تؤکولردیلر باغا اولوب قالان مئیوه نی درردیلر.منده دیلله ننده ،آلما پولوشویولن منی ویراردیلار، اوتاندیغیمدان باشیمی یوخاری قووزایانمازدیم.یایین اورتاسیندا،آرمید –اریگی چیرپاردیم و پامادورلاری دا دردیکدن سونرا ،هامیسینی قاخ ائله ییب داما سرردیم.تورشا شیرین، ره به ره ، قاخلارآدامین آغزینین سویو آخاردی.اینک لری ده ساغدیقدان سونرا سوتو آپاراردیم کندده بلکه آنام  قاتیقدان، پنیردن، کره دن چالخاسین .ائله کی پاییز اولاردی قیزلار هئچ بیریسی منی سایمازدی هردن ایسه باغا خزل ییغماغا گلنده منی هئچ دینله مزدیلر.دئمیرم منیم ده قولاغیم راحات ایدی، ساده جه بالکونون قاباغینداکی برنلیکدن سالخیم-سالخیم اوزوم ساللانمیشدی دئیه بالکوندان باخاندا آلتی گؤرسنمه ییردی و قیزلار یاواشجادان گلیب آلتدان اوزوملردن درردیلر سونرا قاچیب گئده ردیلر.اوزوملرین اولوب- قالانینی دا بیر آزجا سینی درندن سونرا قورودوب کیشمیش ائله ردیم بیر آزینی دا قیش زوماری اوچون دوشاب دوزلدردیم.سونرالار داریخمالی گونلر ایدی هرنه ایدی پاییز سون یارپاقلارینی یئله وئردی و قار دنه-دنه یاغماغا باشلادی.منده قاباقدان اؤدوندان-تزک ده توپلاییب داما ییغمیشدیم.هاوالار سویودوغونا گؤره گتیردیم اودون پونجونو و کورسونو قوردوم.آخشام چاغی سوتو کنده آپاراندا های دوشدو دلی قیز یینه کنده گلیب آمما چولده دولانیر و گؤزه گؤرسنمه ییر.دلی قیزین کئچمیشیندن دئمه لی یم .کندیمیزین یاخینینداکی شهرده رئیحان آدلی بیر قیزواریدی.بیر اوغلانیلان بیر بیریسینه عاشیق ایدیلر.آمما ائله بیل آتا- آنالاری کبین مسله سینه گؤره بیر بیریلن دوز گلمه میشدیلر و بو ایکی یازیغین ائولنمه سینه ایزین وئرمه میشدیلر. اوندان سونرا اوغلان گئدیب اؤزونو آسمیشدی و قیزدا بئناوا دلی اولوب خیاوانلارا دوشموشدو. ائله کی هر گلن بیر متلک آتیرمیش و گئدن باشیندان بیر قاراما و.... دلی قیز قیش اولدوغونا گؤره بیر شئی یئمه یه تاپمامیشدی و کنده ساری گلمیشدی.منده دلی دن چوخ قورخاردیم.سوتو وئرن دن سونرا قاییتدیم ائوه و قاپی باجانی کیلیدله دیم. کورسو یورقانینین آلتینا گیریب. باشیمی چکیب یاتدیم.بالکون دا پئنجره نین قاباغیندابیر فانیس واریدی گئجه لری یانیق قالاردی .دئمه دلی قیز او گئجه چؤلده دولاناندا اوزاقدان فانیسین ایشیغینی گؤرسون و اونا ساری گلسین .بیر آندا شیققیلتی سسی منی یاریمچیلیق یوخودان اویاتدی. یئریمدن قالخدیم، گؤردوم بیر باشی کیلکه لی قیزاوزونو دایاییب  پئنجره دن ایچری باخیر.قورخا- قورخا قاپینی آچدیم کیم اولدوغونو سوردوم  دئدی رئیحانام منده دئجه یین تانیدیم و دئدیم نه ایشین وار بوردا.دئدی آجام ایچری گله بیلرم.منده بیر یاندان یامان قورخورام.بیر یاندان دا قیزا یازیقلیغیم گلیر هر حالدا قیزی ایچری چاغیردیم..بیر آز اریک شورباسی واریدی پونجون اوستونده قالمیشدی وئردیم بیردنه چؤره یی ایچینه دوغراییب یئدی سونرا گئدیب پونجون دیبینده چؤنبلتمه اوتوردو و دیزلرینی قوجاقلاییب منه باخدی.بیر آز ایستی ویراندان سونرا بدنی چیرکلی اولدوغونا گؤره قاشینماغا باشلادی و اؤزونو سؤکدو داغیتدی .منیم اوره ییمه گلدی و پونجون اوستونده ایستی سو واریدی و آپاردیم طؤوله قیشدا ایستی اولدوغونا گؤره چالاسرده تؤکدوم تئشته و اؤز پالتارلاریمدان وئردیم سونرادئدیم اورادا یوونسون.سونرا گلدیم کورسونون بیر تووندا یاتدیم.بیر آز کئچدی رئیحان یووناندان سونرا منیم پالتارلاریمی گئییب اؤز پالتارلارینی یوووب سرندن سونرا گؤردوم گلدی یورقانی اوستومدن چکدی و باشینی یاش- یاش قویدو قولومون اوستونه و یورقونلوقدان همن یوخو آپاردی  او گئجه سی بیردنه قیزین بو قدر منه گوونمه سینه گؤره سحره دک آغلادیم .بیز نئچه موددت باجی قارداش کیمی بیرلیکده قالدیق آمما کندده اولانلاربو مسله نی بیلیب و مامورلارا خبروئرمیشدیلر.بیر گون ائشیکدن گلندن سونرا گؤردوم رئیحانی توتوب آپارمیشدیلار.آمما اونلار گلمه میشدن ایکیمیزه ایکی بوشقاب اریک شورباسی حاضیرلامیشدی و کؤمورولن دوواردا بیرشکیل چکمیشدی.شکیلده کورسونون بیر تووندا بیر  کیشی واریدی واوبیری تووندا بیر دنه باشی کیلکه لی قادین، اوشاق قوجاغیندا اریک شورباسی یئییردیلر.(یوسف جوادی)