شعریمین اوره گینده کی اوشاقلار

شعریمین اوره گینده کی اوشاقلار

ویترین لرین قاش قاباغین دادیرلار

کوچه لری قوجاقلاییب یاتاندا

امزیک امزیک  داشلارین اوینادیرلار

خئیری اولسون قارانلیغین باشینا

کؤرپه لرده دیندیرمه میش اویورلار

گئجه لرین سووقلامیش داشینا

اوره ک لرین قوجاق قوجاق یاییرلار

بویدا بویدا دووارلارین اؤنونده

کیمسه یوخمو اوشاقلاری یوخلویا

بوروننده گون اورتا یاشماغیندا

چیققی چیققی باشماغینی ساخلایا

شعریمین اوره گینده کی اوشاقلار

سؤزلرینی آغلاییر اؤز سسینده

هاییف اولسون سویوق داشا دئییر لر

آغریلارین سیزیلتی لهجه سینده

یوسف جوادی