هر گئجه بیر چیلتیک چالیر, گؤیده بیر اولدوز اویناییر

آلقیشلایین آلقیشلایین, ایچیمده بیر قیز اویناییر

فیریلداییر ائله بیل کی ,کؤز اوستونده بوز اویناییر

دیندیرمه یین قوی اویناسین, یوبانماغین واقتی دئییل

قورخا- قورخا گلینلیگی, اگری یئرده دوز اویناییر

من دئییلم بیر آیری سی, یاشیللیغین ماهنیلارین

اوره ییمده اؤز باشینا, چالیر قاوالسیز اویناییر

ایچیمده گؤینه ین یارا, یالواریری دوزلو یارا

دئییر مندن اینجیمه سین, یارامداکی دوز اویناییر

آغاجلاری تونقال اولوب, منده یانان خاطیرالار

هردن دئشیر کوللوگومو, ایچیمده کؤز- کؤز اویناییر

چال آی آشیق چال سازینی, تئللری بیر- بیر اویناسین

چوخداندیر کی اوره ییمده, نیسگیللی بیر سؤز اویناییر

بیر توی توتوب قارانلیقلار, چیراقلاری دامدان آسیب

هر گئجه بیر چیلتیک چالیر, گؤیده بیر اولدوز اویناییر

یوسف جوادی