اؤلمم هله

اؤلمم هله سئوگیم تله سیر دالدادا سس سیز

آرخام دا یازیق بیر ائل اسیر دالدادا سس سیز

دونیا بویو قوشلار اؤله آنجاق اوچوش اؤلمز

دوشدوکجه للک بیر یئل اسیر دالدادا سس سیز

هئچ کیمسه حایات ماهنیسینی سوسدورا بیلمز

هر پرده سینه بیر تئل اسیر دالدادا سس سیز

گوللر سولادا باغچالاری سولمایاجاقدیر

آچ قونچایا باخ بیر گول اسیر دالدادا سس سیز

نئیلک امین اول قالمایاجاق نیسگیل اوره ک ده

باغلانسا دوداق بیر دیل اسیر دالدادا سس سیز

یوسف جوادی