یاشیل یارپاقلاردا چاپ اولان شئعیرلر(یوسف جوادی)
گئجه لرآسیلان آغ چیراقلاری
گونش دوغوموندا سحر داناجاق
امینم قارانلیق کؤلگه سین سالسا
آسیلان چیراقلار یینه یاناجاق
***
باهار
بیلمیرم ندندیرگولمه‌ییر باهار
شاختانین قورخوسوجانیندا هله
نه قده ر قونچالارآچمایاجاق دیر
گون به گون سون باهار تله‌سیر گله
اوره یی داریخیرچیچک دن ساری
وحشی یئللراسیر سس‌سیز باهاری
هاچان ارییه جک داغلارین قاری
گونئی بوزلارینین باغرینی دله
قاراکول تیکانی بوغور یئل سسین
اؤزگورلوک نغمه سین نئجه سؤیله سین
اومودوم سیزه‌دیر آی یئللر،اسین
قوی باهاراویانسین بزنسین گوله
بولود بوقچا بوقچا گونش وئره جک
هله ده گؤزله ییرگؤزله ییرچیچک
باهارمئوسمینده آچیلسین گره‌ک
قوورولموش قونچاسین وئرمه سین یئله
***
کئفلی بایراغیم
آی منیم یئلله نن کئفلی بایراغیم
بایدا بایدا قانلار ساغلیغین اولسون
شاققیلدیر سسینده دؤیوش ماهنیسی
آی منیم گئجه مین پارلاق اولدوزو
آیاق اوسته اؤلن لرین دایاغی
پارچا پارچا شهیدلرین بویاغی
آهای تاریخ بویو هرنه یه شاهید
آهای سیررلردن آسیلان ایگید
!
***
قرنفیل گوللری
قرنفیل گوللری چیخیب دیر دیزه
قونچالار قان قوسوردوداقدان سوزه
اوره کدن داشاندا یام یاشیل گؤزه
سیلسم اؤلدوررلر سیلمه سم اؤللم
هر گئدن بیر اولدوز گئجه دن یولور
یینه ده گئجه لر اولدوزدان دولور
قار چیچه یی یازی گؤرمه دن سولور
قالسام اؤلدوررلر قالماسام اؤللم
یاز گلیر چیچکلر بورویور داغی
تیکاندان یارالی یئل باغیرماغی
قونچایا بنزیرم شاختالار چاغی
گولسم اؤلدوررلر گولمه سم اؤللم
دورنایام حسرتده گؤلومدن ساری
دومانلی هاوادا سینیرسیزلاری
یاندیریر یارامی وطن دوزلاری
گلسم اؤلدوررلر گلمه سم اؤللم
آناما دئمیشم منه تار آلسین
آلام سینه م اوسته تار منی چالسین
دردیمی دئشمه یین اؤرتولو قالسین
بیلسم اؤلدوررلر بیلمه سم اؤللم
***
یاشیللیغیم
خزللنیر یاشیللیغیم یازیم باشلانا باشلانا
گرایلیمدان دومان کئچیر گؤزوم یاشلانا یاشلانا
هؤرومجه یین دوداقلاری داها منی توخوماسین
اوره ییمده بیر کپنک اوچور قوشلانا قوشلانا
کؤرپه لیگین اویونچاغی هلمده اوینادیر منی
همشه منده بیر دلی قاچیر داشلانا داشلانا
یاستیغیمدا قانلی للک سوورولورام کولک کولک
آغریلاری گؤزلریمی آچیر هوشلانا هوشلانا
بنؤوشه نین دردی مئشه ساچینا دن دوشه دوشه
دوداغیندا موشدولوغو دونور قیشلانا قیشلانا
***
بنؤوشه
خزان قوجاغیندا سولان بنؤوشه
اوره یی پاییزدان دولان بنؤوشه
تورپاغین آغریسین آلان بنؤوشه
یاغیش کدرینی سیله جک دایان
ساچلارین دولاشیب قارانلیقلارا
گونش تومارلارسا چیخار آشکارا
گؤرسه ده یایلیغین بورونوب قارا
خینالی باشیندان بیله جک دایان
یئللر قانادیندا اسن گونلرین
یاغیشی باغرینا باسان گونلرین
گونشی تئلیندن آسان گونلرین
یینه ده او گونلر گله جک دایان
هله تئزدی بئله سولما بنؤوشه
گله جک بیزیم دیر اؤلمه بنؤوشه
گلنه بیر قونچا گولمه بنؤوشه
باهار دوداغیندا گوله جک دایان
***
لاله لر
یایلیغی چئینینده اسن لاله لر
کدر کؤلگه سیندن کوسن لاله لر
گونشی باغرینا باسان لاله لر
ایسته ییر قیزارا ده‌یمه سن آللاه
گوناه سیز گوللرین ساراسی لاله
یاخیلیب اوزونه قاراسی لاله
لاب او اوره گینین آراسی لاله
قوی گیلان کؤزره ده‌یمه سن آللاه
وطن تورپاغیندا بیتن لاله لر
یئرین قوجاغیندا یاتان لاله لر
هره سی بیر قاندی باتان لاله لر
نیشان سیز مزارا ده‌یمه سن آللاه
***
اؤلمم هله
اؤلمم هله سئوگیم تله سیر دالدادا سس سیز
آرخام دا آغیر بیر ائل اسیر دالدادا سس سیز
دونیا بویو قوشلار اؤله آنجاق اوچوش اؤلمز
قانلی له‌لگه داش یئل اسیر دالدادا سس سیز
بیر کیمسه حایات ماهنیسینی کوولایا بیلمز
هر پرده سینه بیر تئل اسیر دالدادا سس سیز
گوللر سولاراق سانکی گولوش سولمایاجاقدیر
هر یایلیق آرا بیر گول اسیر دالدادا سس سیز
نئیلک امین اول فلسفه نین حؤکمو زامان دیر
باغلانسا دوداق بیر دیل اسیر دالدادا سس سیز
***
وطن کی
دنیزین دوزون بیلمه دی
بورویه ر وطنی،
دوزلارا دنیز...
***
آنامین باغرینا بنزه ییر وطن
هر آهین اودقونور توپورسه قان دیر
نه یاخشی ساچلارین بویالیر یوخسا
باخسان هر دنی بیر درده نیشان دیر
***
آذربایجان ترانه سی
دوداقلارا باخ!
اوستو قوزئی سمفونیاسی دیر
آلتی گونئی مرثیه سی
منده دیلینین اوجونداکی
قاراباغ شیکسته سینه تامارزی...
***
سونولور بوتون دونیادا کانسر(سرطان)آغریسینی چکن اینسانلارا
کانسر
تئخنیکا سولویو سورور قانیمی
سوزولور گؤزومون یاشی گؤینه ییر
ائله بیل کی درده تامارزییمیشام
گؤرنه یارالاریم ناشی گؤینه ییر
قویما کپنک لر آغریمی بیلسین
دیله گین حسرتین گؤزومدن سیلسین
هر یانیم یارادی قوی آنام گلسین
یانیر اوره گیمین باشی گؤینه ییر
شاختا چیچگی یم سولمارام هله
باهار گلمه یینجه گولمه رم هله
تئزدی یاشایاجام اؤلمه رم هله
یوخسا مزاریمین داشی گؤینه ییر
سولوک:زالو
کانسر:قانسور،سرطان
تئخنیکا:فناوری
ترکی آذربایجانی
تورکجه شعرلر
حکایت لر
اعضای انجمن(160)
usef1 )
خانه
مطالب(202)
دوستان (102)
گالری تصاویر (144)
کلیپ‌ها (13)
نظرسنجی (1)
سایت و اپلیکیشن آموزش زبان انگلیسی urg.ir
چگونگی درج آگهی در سایت و قسمت تبلیغات
تلگرام 
فیسبوک
تویتر
کاکتوس