یورولموش دالغالار دوزلی دنیزدن
سسلنیب دالغالار باغلاشیردیلار
سوسقون بیر نغمه ده آغلاشیردیلار
سون نفسلرینده جان وئرن چاغدا
قاییدیب عوموردن چاغلاشیردیلار
جوشقونلوق دالغادان قانیما گلدی
سورونوب ساحیلده یانیما گلدی
چئرمانیب ساحیلدن دنیزه گئچدیم
یاییلدی قاداسی جانیما گلدی
سرین یاشاییشلاردالغین ساچدیلار
سو سپدیم دالغالار آغزین آچدیلار
پایلاشیب اَمدیلر جان شوشه سیندن
سونرادان توخالیب ائوه قاچدیلار
گلن دالغا یاراما بوز سالیردی
آیاغیمدان دوز یاراسین یالیردی
یورقون بیر نفسده قاییدان یولدا
توپبا توپبا ساحیلده دوز قالیردی
اوتاندی بولودلار ندن آغدیلار
سویوق ترلر دامجی دامجی یاغدیلار
قم باسانلار قارا گئییب آغلادی
اَمجکلرین قورتوم قورتوم ساغدیلار
ویدالاشدیم آرزیلار منی یوردی
دالغا آیاغیمی دوزلادی سوردی
آچدی قوللارینی باغرینا باسدی
سئوگیسی دوزلی دی شربتی شوردی
دالغالار دنیزه سوسوز دیلدیلر
اومودسیز بیر دویغو یازدیم بیلدیلر
یازدیغیم مکتوبوآددیملاریمدان
اوخویوب بیر به بیر سونرا سیلدیلر
من اولوم سن قال ساغ مکتوبلاریم
ساحیلده یازیلان آق مکتوبلاریم
سطیر سطیر اوخودوقجا سیلینیب
دوزلی گول قورییان چاغ مکتوبلاریم
سئونلر یولینی سئچه جک بیر گون
ایتگین مزارلاردان گئچه جک بیرگون
یاردیمسیز دالغالار یانقولوق سویون
آخان گؤزیاشلاردان ایچه جک بیر گون
یوسف جوادی1393