یالان دونیا

 

 

 

سالوب بیر آیری هنگامه دوشوب دیوانه لر دامه

 

نه ده رحم ائتــــــــدی بهرامه تالان دنیا تالان دنیا

 

نه قدری چالجالاندقجا یاغی یاغ اوستونه قویدون 

 

منیم بلله م یاوان قالدی دوباره چالخالان دونیا

 

 

 

عقیل بو ایشده حیراندی تاپولماز بیر نفر اولسون

 

چراغی صبحه جن یاندی اولوب اِولر ییخان دنیا

 

سالوبدی تاج و تختینــــــــدن سیزیلار شور بختیندن

 

گوتورمز بهره وقتینــــــدن بوروب دائم سیخان دنیا

 

 

 

گوزوم گر عبرتی اولسا بولوت تک کاسه سی دولسا

 

بی جو گر غیرتی اولســــــا آلور بیر امتـــــــحان دنیا

  

بوئیوک بیر اژدها سان سن مگر قارنون دویار مندن

 

آپاردون اختیار الدن چکئـــــــم دائم فغـــــــــان دنیا

 

 

 

گتوردون تنگه دورانی قُروب سنـــــــدن قاچاق هانی

 

نه مـــزدک وار نه ده مانی،یامان دنیــــــا یامان دنیا

 

گیروبسن گونده مین رنگه هامی اوینور بو آهنگه

 

دونـــوبدور قلبـــــــلر سنــــــگه یالان دنیا یالان دنیا

 

 

 

بُتون افلاکی آغلاتدون،آغور یوک بوینوما چاتـــدون

 

هارا اَل قوزادیم باتدون اولــــــوبسان بیر تیکان دنیا

    

سالوبســــــان عالمه محشر دوشوب گردابه محمللر

 

سیزیلار عقــــــــل و جان یکسر آمان دنیا آمان دنیا

 

 

 

بو اوضاعدن قاچاق یوخدور نه دیوانه نه عاقــــللر

 

الی قوینینـــــــــدا آواره دوروب پیـــــر و جوان دنیا

 

آتوبسان چنگ تاریخه وریبسان تیشـــــه هر بیــخه

 

من و ما اِیلیَنـــــلَردن تاپولمـــــــاز بیر نشـــــان دنیا

 

 

 

دگیرمان تک فیریلورسان،بوشیله برکی دارتورسان

 

عمرده هر گون آرتورسان،نولار بیر گون دایان دنیا

 

 آخر مقصودوه چاتدون منی سوزیله آغلاتـــــــدون

 

اوجوز آلدون اوجوز ساتدون منه اولموش عیان دنیا

 

 

 

چکوبسن دشنیــــــه تیزی سالوب گردابه چنگیزی

 

هلاک اتمیشدی پرویزی نه بگ قالدی نه خان دنیا

 

 طلاطم دوشدی دنیایه نه پی قالـــــدی نه ده پایه

 

اولوبسان مرگه همسایه ،غمه ،درده سالان دنیا