گله جک سیزین دیر اوشاقلار

معلوماتیمیزین  اساسیندا 1989-جو ایلده، 54 ماده ده قورولان اوشاق حقوقونون کنوانسیونو باشلانیشیندا اوشاغین محبتله بیر فضادا بسلنمه سی و امنیتله بیر جامعه ده یاشاماغینا تاکید ائدیر.آنجاق 54 ماده لی کنوانسیون اوشاق حقوقونون حاققیندا 4 اؤنملی هدفی ایزله ییر.

1)اوشاغین یاشامیندا تبعیض دن اوزاق اولماسی 2) اوشاغین یاشاییش حاققی و دوغرو معیارلارلا بسلنیلمه سی 3) اؤز عقیده و باخیشلارینی سربست شکیلده دیله گتیرمه سی 4) اوشاقلا باغلی تصمیم توتولان زامان، اوشاغین منافعی ایلک درجه ده گؤز اؤنونه آلماق

 آدلیم روانشناسلارین نظری اوزره اوشاق آنا قارنیندا اولان زاماندا دا بیر سیرا رفتارلاری گؤتورور. آنجاق دونیایا گلمه سیندن سونرا آنانین ایکی بؤیوک نقشی اوشاغین پرورش تاپماسیندا دانیلماز ساییلیر. بیرینجی وراثتی نقش و ایکینجی محیطی نقش. وراثتی نقش اؤرنک اوچون آلچاق بوی یوخسا اوجا بوی اولماسی، گؤز بویاسی، آغ یوخسا قارا و باشقا اؤزللیک لردن عبارت اولور. آنجاق ایکینجی نقش ( محیطی نقش) آنانین ان اؤنملی نقشی اولا بیلر. اوشاغی ائوده آلقیشلا یاناشی تربیت وئرمک یوخسا اوشاغین بیر سیرا چیرکین ایشلره ال آپارماسینا خاطیر تحقیر و توهین وحتی یوخاری درجه ده تنبیه ائتمک اوشاغین گله جه یینده اثر قویور. باشقا سؤزله دئسک انسانین شخصیتین تشکیل وئرن بو آلقیشلار و تحقیر توهین لر اولور.اوشاغا دیکتاتورلوق روحیه سینی و غیرمنطقی شکیل ده سؤزه باخماماغی اؤیرتسک،اولار آلمان اؤلکه سینده هیتلر. اوشاغا مهربانلیق، گلیشمه و ظولمه قارشی باش ایمه مه یی ذهنینده قالارقی ائتسک اولار ایراندا امیرکبیر.

اوشاغین گله جکده یاشادیغی جامعه ده یوکسک شخصییته مالک اولماغینی دیله ییریک سه ان کیچیک یاشدان باشلامالیییق. بوتون دونیانین بیر اؤلکه یه باخیشی، او اؤلکه نین اوشاقلارینا باغلی اولدوغو دوغرو سؤزدور نییه کی بو اوشاق دیر اولور نلسون ماندلا واینسانین قارا یا آغ اولدوغونو بیر امتیاز کیمی بیلمیر و یا بو اوشاق اولور استالین و سوسیالیست دوشونجه سینین اساسیندا مینلرجه اینسانین جانین آلیر.

اوشاق ائودن چیخدیقجا باشقا بیر دونیایا قدم قویور. آنجاق بو دونیانی اؤزو سئچه بیلمز و سئچه  بیلمه یه جک. بو دونیانی یاشادیغی جامعه نین «آموزش و پرورش» آدلی بیر سازمان اونا تشکیل وئریر.شوروی ده دوغولورسا کیریل الیفباسینی اؤیره نه جک و بو حرفلری بیری بیریسینه یاپیشدیراندان سونرا انترناسیونالیسم، داروین، کمونیسم آدلی بیر سؤزجوک لرله تانیش اولوب و بو اصطلاح لارلا یاشایاجاق. ایراندا پهلوی دؤنمینده دوغولورسا فارس الیفباسینی اؤیره نه جک و آریامهر، هخامنش و رستاخیز آدلی بیر اصطلاح لار بئینینده  یئر توتاجاق.

آنجاق جامعه اوشاغین فیکری بلوغا یئتیرمه سینه قایغی چکسه، اؤلکه نین گله جه یین تضمین ائدیر.اوشاف ایلک مکتبده، منیم یاشیت لاریم ندن تحصیل آلماقدان محروم اولوب و ایشله مه یه اوز گتیریرلر؟ دونیادا میلیونلارجا اوشاغین گوناهسیز ساواشا قوربان اولماقلارینین سببی نه دیر؟ منیم یاشادیغیم اؤلکه ده نقشیم نه دیر و بو اؤلکه نین گله جه یینه نه ائتمه لی یم؟ و باشقا سورغولار فیکرینه گلیرسه اؤلکه نین دونیادا اوغور قازانماسینی گؤستریر.پس عاییله ایله «آموزش وپرورش» ین بیرلیکده گله جک قورماقلارینی نتیجه آلماق اولور.

بئله لیک له عاییله نین ائتکی سی اوستون گؤرونور.نییه کی عاییله اوشاغین منطق، باریش، سایغی اساسیندا تربیت وئرسه بو اوشاق و باشقا اوشاقلار جامعه نین «آموزش و پرورش» سیستمینی و بو سازمانا قایدا تعیین ائدن سیستم لری قوراجاقلار.سایدیغیمیز فاکتورلارلا اوشاغیمیز بسلنیلسه قومی تبعیض دن اوزاق، اوشاغین ذهنینده دئولت ایسته دیگی ایدئولوژی نی یاراتمایان، باشقا اؤلکه لره قارداشجاسینا باخان بیر «آموزش و پرورش» سیستمی قورولور و او زامان اوشاق حقوقونون کنوانسیونو ایسته دیگی بیر جامعه یارانیر.

اوشاق حقوقونو رسمیته تانییان و دوشونجه باخیمیندان فیکره صاحب اولان اوشاغی جامعه یه تحویل وئرن اؤلکه،  بوتون دونیایه الگو اولماق پتانسیلی واردیر.بئله الگو یارانیرسا داها عراق و افغانستاندا گوناهسیز اوشاقلارین قانین یئرده گؤرمه یه جه ییک و آفریقادا سایسیز اوشاقلارین آشاغی یاشدا زورلا ایشلدیلمه سینه شاهد اولمایاجاغیق.