میلادمولی الموحدین

ای صفاتون خالقه بنزر علی جان یا علی
یارحق ای حقّه مستظهر علی جان یا علی
سن کیمی کیم اولدی مولا مصطفایه مصطفی
جانشین و جان پیغمبر علی جان یا علی
دیل لر الکن مدحیوه عاجزدی وصفوندن قلم
عین کوثر دشمنین ابتر علی جان یا علی
مفخرارض وسماسن یا علی المرتضی  
خلقتوندی عالمه زیور علی جان یا علی
بای بسم اللاهیده بیر نقطه تک ائتدین ظهور
  کل قرآن حمدیده مضمرعلی جان یا علی
حیدر وصفدر سن ای شه هم امام المتّقین
مرتضی ای سرلره  افسر علی جان یا علی
هم عدالت هم شجاعت هم سخاوت شهرتین
دولدوروپدی یئرگویی یکسر علی جان یا علی
شیر یزدان لطف رحمان چشمه ی فیض ازل
ای وجودون آللاها مظهر علی جان یا علی
حدّ فاصل لا اله ، اَللاهه، الاّ الفی سن
الف ، الف  قدرته منظر علی جان یا علی
ای صراط المستقیم ای جنّت و ناره قسیم
لطف حقدن شافع محشر علی جان یا علی
عالی اعلادن آللاه منشق ائتمیش آدیوی
تا اولان مخلوقه سن سرور علی جان یا علی
غیر پیغمبرکیمین آرتیخدی سندن رتبه سی
انبیادنده اولوپسان سر علی جان یا علی
سوره ی نور آیه ی نور ای وجودی جمله نور
خلق ایچینده نیّر اظهر علی جان یا علی
مرز او ادنی دنوّا واقترابا گورسدیر
دولدوروپ آفاقی سرتاسر علی جان یا علی
ائیلیوپ خالق   سنین مولا؛ جمالین چوخ جمیل
بحر خلقتده اولان گوهر علی جان یا علی
جوهر خلقت وجودون ؛ جمله ی دنیا عرض
یوخ سنین تک کیمسه نام آور علی جان یا علی
تک سنه آللاه وئربپ لفظ امیر المومنین
ای بشیکده حیّه در حیدر علی جان یا علی
گورمیوپدی مصطفایه سن کیمی بیرکس معین
صف یاران صف سیندیران صفدر علی جان یا علی
دوت ولایی نین الیندن یا علی المرتضی
کربلا دیدارینه گوندر علی جان یا علی
من گدایم درگهینده ای شه عالیمقام
لطف ائله ای خواجه ی قنبرعلی جان یا علی