متن نوحه ترکی(بو عالـم سر بسر ویـران اولیـدی)

بو عالـم سر بسر ویـران اولیـدی
 
نه دشـت کربـلا آلقـان اولیدی
 
نه اهــل کوفیـه پیغمبـر اوغـلی
 
گلیدی کوفـه‌ده مهمـان اولیدی
 
نه اکبـر قطعـه‌قطعـه دوغـرانیدی
 
نه لیلانون ایشـی افغـان اولیدی
 
علی‌اکبـر نه تشنـه جـان ویریدی
 
نه زلفی گل یوزه افشـان اولیدی
 
نه قاسمون طویـی یـاسه دونیدی
 
نه الده طوی حناسی قان اولیدی
 
نه عبّاسون قولـی تندن دوشیدی
 
نه جسمی خاکیله یکسان اولیدی
 
نه قوللاری دوشوب بیرق یاتیدی
 
نه پـرگار حسین تـالان اولیـدی
 
سـودان اوتـری نه اصغر آغلیدی
 
حسین نه عـازم میـدان اولیـدی
 
نـه اصغـر اللـری اوستـه امامون
 
نشـان نــاوک پیـکان اولیــدی
 
یانانـدا خیمه‌لـر بیر اود دوشیدی
 
بو عالم اود دوتوب سوزان اولیدی
 
نـه زینب او جــلالیـله گلیــدی
 
اسیـر لشگــر عــدوان اولیـدی
 
نه قول باغلی گیدیدی شهر شامه
 
نه منـزل زینبه ویــران اولیـدی
 
سوسوزدان نه سکینه ضعف ایدیدی
 
نه آل مصطفی گریــان اولیـدی
 
نه اوچگون اوچگجه پیغمبـر اوغلی
 
حسینون پیکـری عُریـان اولیدی
 
نه باشی نیزه باشینده او شاهون
 
گیدیـدی خولیـه مهمان اولیدی