بو اؤزللیگی اؤزلویوموزون آیریلماز بیر پارچاسی اولاراق قبول ائدک می؟!

اولو تانرینین آدی ایلا

کسین هامیمیز بو سورغونو اؤزوموزدن و یا باشقالاردان سورموشوق:

بیز ندن بئله راحاتجا یالان دانیشیریق؟!

آمما ایندی یه قدر بو سورغویا جاواب تاپمیشیق می؟ تاپمیشیق سا, بو خصیصه نی اؤزوموزدن اوزاق سالماغا بیر ایش گؤرموشوک مو؟

منجه بیر توپلومون یاشادیغی اینسانلاری آراسیندا, یالانین و یالانچیلیغین نه قدر گئنیش یاییلدیغینی دوشونمک اوچون بیر نیشانه یه دیققتلی اولماغیمیز یئتر؛ خالقین بیری - بیرینه اولان اعتمادینین گونو گوندن آزالماسی!

یالان - کیچیک مقیاسلاردا بیله- تکرار اولدوقجا, اینسانین یاشام سوره جینده دوغرولوب اولوشان اؤزلویونده درین ائتکی لر بوراخیر. روانشناسی عالیم لرین آراشدیرمالاری اساسیندا, اوشاق 6-5 یاشیندان باشلایاراق, یالانی دوغرودان سئچه بیلمک باجاریغینی قازانیر. دئمک همن یاشلاردان ایلکین یالانلارینی سؤیله مه یه ده باشلایا بیلر. اونون قارشیسیندا عاییله لرین نئجه داورانماسی اؤنملی بیر مسئله دیر.

اوشاق غالیبن مخمصه دن قورتولماق اوچون یالان دانیشماغا اوز گتیریرسه, بؤیوکلر داها چوخ نفعلرینی قوروماق اوچون و بیر سیرا باشقا ندنلره گؤره بو ایشه ال قویورلار. او جومله دن, تنقید اولونماقدان قورخماق, باشقالاری آلداتماق (مثلا زیرنگم دئیه!), بیر منفعت قازانماق و یا بیر ضرردن قاچماق. بیر چوخ یالانلاریمیزدا مصلحت دئییلن بیر موضوعا قاییدیر.

نه ایسه! هامی بو خصیصه نین اینسانلیقدان اوزاق اولدوغونو دوشوندویونه رغمن, عملده ترسینی گؤروروک و تقریبا هر گون یالان دئییب یالان ائشیدیریک. چئشیدلی بیچیم لرده و موختلیف فورمالاردا؛ چونکو یالان تکجه دیله باغلی اولان بیر مسئله دئییل. گاهدان بیر حرکت, بیر عمل, بیر باخیش و یا حتی بیر سوکوت آچیق آیدین بیر یالان ساییلا بیلر.

بو خالقیمیزا یاراشمایان خصیصه نین گله جک نسیللره داشینماماسی اوچون اؤزوموزه عایید اولان هانسی سا حاضیرلیق لار گؤرموشوک مو؟