یاریمچیق قالمیش آذربایجان تابلوسو!

یاریمچیق قالمیش آذربایجان تابلوسو

 قوزئیی کؤلگه لی

کؤلگه نی یوخولو چکیرم

گونئیی گونشلی

گونشی بولودسوز

بولودو دومانلی چکیرم

قارانی سئومیرم

قاراباغی قیرمیزی چکیرم

اورمونون باختینی

تبریزین تاختینی

قارا چکه نمیرم

آغ چکیرم

سهند،

ساوالانین زیروه سی کیمی

ال قوشونو آل چکیرم

تورپاغی مفتیلی

سارالمیش بنیزلر قانیمی چکمیر

بابکین کؤینگی ایله سیلیرم

کولباش داغلاری

کولرنگ اووالاری

خزل گئیمش باغلاری

نسیمی دیلیم

نئیله ییم

یام – یاشیل چکیرم.

اورمو گؤلونو چکه جکدیم

آمان تانریم

ماوی رنگیم قورویوب…