منده تئهرانا گئده جییم!

اینسان روانشناختی دلاییله گؤره آنا یوردونا باغلی لیغی واردیر و بو انسانلارین چوخونون آرزولاریندان بیری آنا یوردوندا یاشاماقدیر نئجه کی آتا بابالاریمیزدان بیر سؤز واردیر دئییر : "دولانماغا باشقا اؤلکه ، یاشاماغا وطن". آمما یاشاییش انسانلارین بیر سیراسینی اؤز آنا یوردلارین ترک ائتمک و قوربت ده یورد سالماغا مجبور ائدیر! بو یازی دا آذربایجانلی لارین اؤز یوردلارینین ترک ائتمه یی و مجبوریتله "فارس نشین" شهرلره کؤچمه سی نین ندنی نی آراشدیرمالی ییق.

ایندیه دک بو جمله نی چوخ ائشیدیب و یا گؤرموشوک "آذربایجانی های مقیم تهران ، اصفهان ، بوشهر و ..." آمما بونون ترسینی "اصفهانی های مقیم تبریز ، قزوین ، ارومیه و ..." آز گؤروب و ائشیتمیشیک بلکه ده هئچ بئله بیر جمله قولاغیمیزا دیمه ییب دیر.اوزاغا گئتمه یک بیر آز فیکیرلشندن سونرا اؤز تانیش لاریمیزدان تئهرانا کؤچنلردن نئچه سینی سایاجاغیق! ایندیسه جمعیتی آمارا باخاراق تئهرانین 15 میلیونا یاخین جمعییتی نین یوزه اللی سین بلکه ده چوخون آذربایجانلی لار تشکیل وئریرلر! آمما هئچ ایندیه دک بو کؤچمه لرین ندنی و آذربایجانلی لار اؤز یوردلارین ترک ائدیب باشقا شهرلرده یورد سالمالارینی اؤزومیزدن سورموشوق می؟

بو مساله یه بیر آز فیکرلشدیکجه بو کؤچمه لرین ان اؤنملی ندنی نی اقتصاد مساله سی بیله جه ییک!! نیه کی 86 آلتی ایلدن گئری دؤنه رک چیشیتلی ساحه لر و اؤزللیکله اقتصاد ساحه سینده بیر میللی ستم غیر فارس میللت لر و اؤزللیکله آذربایجان میللتینه دوغرو گئدیر و هله ده آذربایجانین اقتصادی فلج دیر و نئچه گوجلو صنعتی مرکزی یوخدور تا بیر آذربایجانلی تحصیلاتین قورتاراندان سونرا اؤز یوردوندا ایشله سین و بو مساله اونو مجبور ائدیر ایش تاپماق اوچون تئهران ، اصفهان ، عسلویه و ... گئتسین.

بو مساله شاید بیر عیدده نین نظرینده بیر پوچ قونو اولا آمما بو کؤچمه لرله بیر انسانی فاجعه بیزیم آذربایجاندا اوز وئریب ، وئرجکدیر. منجه بو مساله ایندی بیز آذربایجانلی لارین یاشاییشیندا ان اؤنملی مساله و بیر دغدغه یه تبدیل اولمالی دیر و اونون قارشی سیندا چیخاماق بیر وظیفه! نیه کی بو کؤچمه لر اینسان لاری آنا یوردلاریندان اوزاق سالیب و گله جک ده بو انسان لار کیملیک بحرانی ایله یاخالاشاجاق لار! ائله بو کؤچن اینسانلارلا بیر آز دانیشدیقدان سونرا اونون کیملیین سوراسان تورکجه نی اونودوب و فارسجا دییه جک "من خودم ترک هستم!".

آردی وار