حسینه یئرلر آغلار گؤیلر آغلار - دادا بیلوردی

« حسینه یئرلر آغلار گؤیلر آغلار

بتول و مرتضی ، پیغمبر آغلار »

حسینین نوحه سین « *خازن » یازاندا

قلم جوشه  گله ر  چون،  دفتر آغلار

گؤره ر  اولاد ِ  پیغمبرده  ماتم

تأسّفله  خدای  داور  آغـلار

باخار عطشانلارا  زهرای  اطهر

داشیب معناده حوض ِ کوثر آغلار

عدالت مولکونون شاهی اؤز اوغلون

تاپار میدانیده  بی یاور آغلار

بو گون  یئر گؤی  دؤنوب ماتمسرایه

سیزیلدار  کائناتی  یکسر آغلار

رباب اوخشارکی  ای وای  اصغریم  وای

تیکه ر  گؤز  قانلی مشکه  اکبر آغلار

دوشنده  یاره لی آتدان  ابوالفضل

عَلَم  اوخشار،  یئر اوسته  اَللر آغلار

پوزولدوقجا  حسینین  گول جمالی

یاس آغلار نرگس آغلار اختر آغلار

قوجاقلار  قارداشین  مقتلده  زینب

قیزیل قانه  بَله نمیش  معجر آغلار

یانار اخیامی  یانغی  سینه لر تک

چاپار نعش اوسته لشگر، حیدر آغلار

دییه نده   خارجی   قوم ِ  رسوله

 اولار  بو  کائناتی  محشر ، آغلار

اسیرلر یاندیرار ارض و سمانی

باش آغلار، روح آغلار، پیکر آغلار

شهین باشین قویارلار داشین اوسته

داش آغلار، نیزه آغلار، خنجر آغلار

دییه نده  مرثیه  کرب و بلادن

حسینه مسجد آغلار منبر آغلار

یانار  خازن تکی  یالقیز دادانی

حسینین ماتمینده  مضطر آغلار

دادا بیلوردی

17/04/1403

«خازن» = مرحوم میرعبدالحسین خازن تبریزی

 از شاعران دلسوز زمان مشروطه