زیرنا

ائل ماهنی سی هردن بوغولور زیرنا سسینده

هردنسه زیریلدانسا سسی سون نفسینده

ییرتیر بوغازین ائل غمی نی زیرنا، چالاندا

چاتمیر سسی زوردان گؤ...پاتلیر بالاباندا

زیرنا گؤروسن کؤکسونه باخ تئیخا دلیک دیر

گولله یئری باغریندا وطن دیر کی بؤلوک دیر

باس بارماغینی هر دلیگی آغری لی سس دیر

کؤکسون یاراسیندان باغیران سسلی نفس دیر

هر یئرده هاوا آغری چکیر زیرنانی سسلیر

هر سس کی قورتولموش دلیگیندن هاوا بسلیر

ایستر سه باغیرسین سسی بیر یاندا کسیردی

هئی...هر سسی بیر بارماغین آلتیندا اسیردی

قوشلار سسی دیر زیرنادا بیداد زاماندا

بیر سس باتیریر هر گؤزونو زیرنا یوماندا

یورقون دوشوب ایللر بویو دور کؤکله نیر ایندی

زیتقینماسی بیر زیرناچی نین دردی منیم دی

(یوسف جوادی)07/02/95